ԵՐԵՎԱՆ, 30 հոկտեմբերի — Sputnik. Իտալիայի կենտրոնում կիրակի տեղի ունեցած երկրաշարժը 1980 թվականից ի վեր ամենահզորն էր, Քիջիի կառավարական պալատում կազմակերպված հատուկ մամուլի ասուլիսի ժամանակ ասաց երկրի վարչապետ Մատեո Ռենցին, հայտնում է ՌԻԱ Նովոստին:
«Սա 1980 թվականից ի վեր ամենաուժեղ երկրաշարժն էր: Այն ավելի ուժգին էր, քան այն, որ տեղի ունեցավ մի քանի օր առաջ, քան այն, որ եղավ օգոստոսին, ավելի ուժեղ, քան Էմիլի Ռոմանիեում 2012 թվականին տեղի ունեցած երկրաշարժը, 2009-ին Աքվիլում և 1997-ին` Ումբրիայում», — ասել է Իտալիայի կառավարության ղեկավարը:
Բարեբախտաբար, իտալացի վարչապետի խոսքով, թեև ստորգետնյա ցնցումները չափազանց ուժեղ էին, սակայն ոչ ոք չզոհվեց:
«Լավ է, որ զոհեր չկան: Ստուգումները շարունակվում են, մենք կենտրոնացրել ենք մեր ուշադրությունը տուժածների քանակի վրա», — ընդգծեց Ռենցին:
«Վաղը կանցկացվի նախարարների խորհրդի նիստ անհրաժեշտ միջոցներ ձեռնարկելու համար: Խոստանում եմ, որ մենք ամեն ինչ կվերականգնենք`տները, եկեղեցիները և առևտրի կենտրոնները», — հավաստիացրեց նա:
Երկրաֆիզիկայի և հրաբխագիտության ազգային ինստիտուտի (Ingv) տվյալների համաձայն, երկրաշարժի էպիկենտրոնը գտնվում էր Պերուջայի և Մաչերատայի միջև, Նորչա քաղաքի մոտակայքում: 20 րոպե անց 4.6 և 4.1 մագնիտուդով ստորգետնյա նոր ցնցումներ են եղել: Երկրակեղևի ցնցումները զգացվել են ամբողջ Իտալիայում, այդ թվում` Հռոմում և կենտրոնական Իտալիայի այլ խոշոր քաղաքներում: Իտալիայի քաղպաշտպանության ծառայությունը նշում է, որ աղետի հետևանքով տուժել է մոտ 20 մարդ:
Ավերածությունների մասին տեղեկություն է ստացվում կենտրոնական Իտալիայի այն շրջաններից, նախևառաջ` Մարկե և Ումբրիայից, որտեղ հոկտեմբերի 26-ին տեղի էր ունեցել 5.9 մագնիտուդով երկրաշարժ: Այսպես, օրինակ, Ուսիտա գյուղում, որտեղ անցած չորեքշաբթի լուրջ ավերածություններ էին արձանագրվել, այժմ գրեթե ոչ մի շենք կանգուն չի մնացել:
