ԵՐԵՎԱՆ, 30 հոկտեմբերի — Sputnik. Երկրաշարժի էպիկենտրոնը գտնվում էր Պերուջայի և Մաչերատայի միջև: 20 րոպե անց 4.6 և 4.1 մագնիտուդով ստորգետնյա նոր ցնցումներ են եղել: Այս մասին են վկայում Երկրաֆիզիկայի և հրաբխագիտության ազգային ինստիտուտի (Ingv) ճշտված տվյալները, հայտնում է ՌԻԱ Նովոստին:
Երկրակեղևի ցնցումները զգացվել են ամբողջ Իտալիայում, այդ թվում` Հռոմում և կենտրոնական Իտալիայի այլ խոշոր քաղաքներում:
Ավերածությունների մասին տեղեկություն է ստացվում կենտրոնական Իտալիայի այն շրջաններից, նախևառաջ` Մարկե և Ումբրիայից, որտեղ հոկտեմբերի 26-ին տեղի էր ունեցել 5.9 մագնիտուդով երկրաշարժ: Այսպես, օրինակ, Ուսիտա գյուղում, որտեղ անցած չորեքշաբթի լուրջ ավերածություններ էին արձանագրվել, այժմ գրեթե ոչ մի շենք կանգուն չի մնացել:
«Ամեն ինչ փլվել է, միայն փոշու ամպեր են երևում: Սա աղետ է, դժոխք է», — լրագրողներին հեռախոսով հայտնել է Ուսիտայի քաղաքապետ Մարկո Ռինալդին:
Նրա խոսքով` հավանաբար, ոչ ոք իր հայրենակիցներից չի տուժել, քանի որ վերջին օրերին բոլոր բնակիչները գնացել էին իրենց ազգականների և ընկերների մոտ:
Նորչա քաղաքից հաղորդագրություններ են ստացվել, որ երկրաշարժի հետևանքով երկու հին եկեղեցի է ավերվել` սբ. Բենեդիկտոսի բազիլիկ եկեղեցին և սբ. Մարիամի տաճարը: Լուրջ ավերածությունների մասին են հայտնում նաև Ակուասանտա Տերմե քաղաքի իշխանությունները, սակայն այնտեղ էլ հույս ունեն, որ բնակիչներից ոչ ոք չի տուժել:
Հռոմից, որտեղ ստորգետնյա ցնցումներն ուժեղ զգացվել են, դեռ ավերածությունների վերաբերյալ տեղեկություն չկա, սակայն մայրաքաղաքային մետրոյում աշխատանքը դադարեցվել է անհրաժեշտ ստուգումներ անցկացնելու համար:
