ԵՐԵՎԱՆ, 29 հոկտեմբերի — Sputnik. Հայկական զինված ուժերի ինժերենական ծառայության ջանքերով և Հումանիտար ականազերծման կենտրոնի փորձագիտական աջակցության շնորհիվ Սյունիքի մարզի Եղվարդ և Ուժանիս համայնքների մոտ լքված զինամթերք է հայտնաբերվել։
Պաշտպանության նախարարության լրատվական ծառայությունը հայտնում է, որ իրականացված հետազոտության արդյունքում նշված տարածքում դեռևս 90-ականների մարտական գործողություններից հետո հակառակորդի լքած հենակետերում հայտնաբերվել է զինամթերքի 2 կուտակատեղի` 44 միավոր 82 մմ, 12 միավոր 120 մմ ականանետի ականներ և մեկ միավոր 100 մմ հրետանային չպայթեցված արկ:
Հայտնաբերված զինամթերքը հոկտեմբերի 27-ին ոչնչացվել է էլեկտրական ճայթիչ հրապատիճի կիրառման մեթոդով:
Եղվարդ և Ուժանիս համայնքների հարակից տարածքներում հակառակորդի մեկ այլ նախկին դիրքում լքված զինամթերքի նոր խմբաքանակի հայտնաբերմանն ուղղված աշխատանքները շարունակվում են:
Այն տարածքները, որտեղ հայտնաբերվել է լքված զինամթերքը, Եղվարդ և Ուժանիս համայնքների բնակիչների կողմից օգտագործվում է որպես խոտհարք և արոտավայր, ինչը ևս մեկ անգամ զգոնության ու աչալրջության կոչ պետք է լինի համայնքների բնակիչներին`վերստին հիշեցնելով նրանց, որ կտրականապես արգելվում է մուտք գործել վտանգավոր տարածքներ:
Անտարակույս, լքված զինամթերքի հայտնաբերումը վառ ապացույցն է այն բանի, որ հայ-ադրբեջանական հակամարտության տարիներին հակառակորդի մարտկոցները այդ դիրքերից ականակոծել են Եղվարդ և Ուժանիս համայնքային կենտրոնները: Ըստ ամենայնի, մեր հրետանու նշանակետային գնդակոծման հետևանքով հակառակորդը խուճապահար լքել է դիրքերը, թողնելով զինամթերքը և արդեն կրակի պատրաստ արկերը:
