ԵՐԵՎԱՆ, 29 հոկտեմբերի-Sputnik. 10-ամյա Հայկը մեկ տարի առաջ անմիջականորեն առնչվեց ծրագրավորման տարրական կանոններին ու հայտնաբերեց իր համար մի մեծ աշխարհ: Այնքան նվիրվեց ոլորտի ուսումնասիրությանը, որ կարճ ժամանակահատվածում ստեղծեց իր կյանքի առաջին լուրջ գործը՝ համակարգչային խաղ: Դրանից հետո վերջնականապես համոզվեց՝ մեծանալու է և դառնա ծրագրավորող:
«Երբ խաղ ստեղծեցի, այնպես արեցի, որ դրանից երեխաները ագրեսիվ չդառնան: Հաճույքով եմ գալիս տեխնոլոգիական կենտրոն, որովհետև գիտեմ՝ շատ բան եմ սովորելու»,-ասաց Հայկը:
![Открытие технологического центра в Ванадзоре Открытие технологического центра в Ванадзоре - Sputnik Արմենիա](https://cdn.am.sputniknews.ru/img/531/09/5310906_0:0:1600:1200_600x0_80_0_0_2dd29140ee8a332932eece2608d53d3e.jpg)
Վանաձորի տեխնոլոգիական կենտրոնը ստեղծվել է ՀՀ կառավարության, Ձեռնարկությունների ինկուբատոր հիմնադրամի և Համաշխարհային բանկի համագործակցության արդյունքում: Հիմնական նպատակն է՝ մարդկանց տեխնիկական և գործարար հմտությոնները զարգանան, երեխաները ճանաչեն ՏՏ ոլորտը, մյուս կողմից էլ ակտիվանան արտասահմանյան ներդրումները:
Գյումրու տեխնոլոգիական կենտրոնի օրինակով այս մեկը ևս կդառնա քաղաքի ու նաև մարզի տնտեսական կարևոր բաղադրիչ, կստեղծվեն նոր աշխատատեղեր, կակտիվանան հայաստանյան ու արտասահմանյան կազմակերպությունների ուղղակի շփումները:
«Կենտրոնի առավելություններից է աշխատատեղերի ստեղծումը, ուսումնական պրոցեսի խոր ուսումնասիորթյունն ու կադրերի պատրաստումը»,-ասաց տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը:
Լոռու մարզպետ Արթուր Նալբանդյանն էլ հիշեցրեց, որ Լոռին արդյունաբերական մարզ է, իսկ տեղեկատվական տեխնոլոգիաների զարգացումը կարող է նպաստել, որ եղած արդյունաբերությունը նոր շունչ ստանա:
«Արդյունաբերական քաղաքում մտածել էր պետք, թե տնտեսությունն ինչ նոր զարգացման հեռանկարներ կարող է ունենալ, իսկ զարգացման հեռանկարներից մեկը ՏՏ ոլորտն է: 21-րդ դարում առանց ՏՏ ոլորտի ճիշտ չէր լինի Վանաձորը զարգացնել: Ես համոզված եմ, որ տեխնոլոգիական կենտրոնը Վանաձորի տնտեսության մեջ շրջադարձային քայլ էր, առաջիկա ամիսներին, տարիներին դուք կտեսնեք, թե Վանաձորի տնտեսոթյան զարգացման մեջ ինչ դրական, զգալի տեղաշարժ է լինելու»,-ասաց մարզպետը:
Sputnik Արմենիայի այն հարցին, թե մարզպետն ինչպես է պատկերացնում մարզում զբաղվածության խնդրի լուծումը, նա պատասխանեց, որ այն կարգավորման ընթացքում է:
![Открытие технологического центра в Ванадзоре Открытие технологического центра в Ванадзоре - Sputnik Արմենիա](https://cdn.am.sputniknews.ru/img/531/09/5310970_0:0:1600:1200_600x0_80_0_0_6ff23e27adf0de7d33c4336d5c03f68f.jpg)
«Այս կենտրոնը կստեղծի 150 ուղղակի աշխատատեղ, իսկ 2 տարվա մեջ նախատեսվում է շուրջ հազար աշխատատեղ ավելացնել: Արդյունաբերության մեջ վերջին տարիներին, հատկապես քիմպրոմի հետ կապված, մենք ունեցանք որոշակի խնդիրներ, և խնդիրներից մեկն արտագնա ախատանքն է, բայց համոզված եմ, որ նմանատիպ քայլերով մենք կկարողանանք այդ խնդիրներն օր առաջ լուծել, նվազեցնել արտագաղթի ծավալները»,-ասաց նա:
Որպես ասվածի վառ օրինակ, նա ներկայացրեց Էռնեստ Քրիստափորյանին, որն ուսանել և աշխատել է Եվրոպայում, Ճապոնիայոմ, իսկ հիմա իր ապագան տեսնում է Հայաստանում:
«Ուսանողների համար պատրաստում ենք ուսուցման ծրագրեր: Նոյեմբերից Պոլիտեխնիկի ուսանողները գալու են դիպլոմային աշխատանքներն այստեղ պատրաստեն գործնականում»,-ասաց Քրիստափորյանն ու աշխատացրեց հաստոցը, որը տալիս է պլաստիկից ու մետաղից պատրաստված առարկաներ:
Դրանք հետագայում վերածվում են ավտոմասերի և այլ առարկաների, նայած թե ինչ պատվերներ կստանան ընկերություններից:
Վանաձորի տեխնոլոգիական կենտրոնում իրականացվում են ՏՏ և ճարտարագիտական ոլորտներում մասնագիտական դասընթացներ: Արդեն իսկ վերապատրաստվել են շուրջ 4000 աշակերտներ, ուսանողներ և մասնագետներ:
Կենտրոնում գործում են եռաչափ տպիչներով և CNC համակարգով մետաղամշակման գերժամանակակից սարքավորումներով հագեցած լաբորատորիաներ, որոնք հնարավորություն են տալիս ճարտարգիտական ոլորտում նախատիպեր մշակել, փորձարկել ու նոր արտադրանք մշակել: