Հայտնի դերասան Հրանտ Թոխատյանը Sputnik Արմենիային տված հարցազրույցում պատմեց նոր ներկայացման և դերասանի դժվար մասնագիտության մասին։ Զրուցեց Անի Լիպարիտյանը։
- Առաջիկայում Դուք նոր դերեր նախատեսու՞մ եք ունենալ ռուսական կինոյում։
— Գիտե՞ք, այստեղ նախատեսելը չէ հարցը, այլ առաջարկը։ Եթե հետաքրքիր առաջարկներ լինեն, հաճույքով կխաղամ։
- Ինչպե՞ս եք գնահատում հայ-ռուսական «կինեմատոգրաֆիական» հարաբերությունները, որը քիչ պատմություն չունի։
— Ինձ թվում է` այդ հարաբերությունները կարող են ավելի ընդգրկուն լինել, քան այսօր։ Առաջին հերթին` այն պատճառով, որ ռուսական շուկայում աշխատում են բազմաթիվ հայկական պրոդյուսերական ընկերություններ, ռեժիսորներ։
Դատելով տեղի ունեցող գործընթացներից` ամեն ինչ դեպի դրան էլ գնում է. Ինչպես ցույց են տալիս վերջին համատեղ աշխատանքները, հեռանկարում մեզ մի շարք համատեղ նախագծեր են սպասում։ Հայ-ռուսական ֆիլմեր լինելու են և պետք է ավելի շատ լինեն։
- Ինչո՞վ կուրախացնեք հայ հանդիսատեսին մոտ ապագայում։
— Նոր ներկայացումով։ Կարծում եմ` հանդիսատեսն այն կկարողանա դիտել փետրվարին։ Դա Mea Culpa-ի նոր բեմադրությունն է` Mea Culpa-2-ը։
- Ի՞նչ կմաղթեք սկսնակ դերասաններին։
— Կարծում եմ` պետք է սիրես աշխատանքդ և հիշես, որ դերասանի մասնագիտությունն ամենաբարդ մասնագիտություններից է։ Հենց այդպես պետք է այն ընկալես, այդ դեպքում ամեն ինչ կստացվի։ Կարևոր եմ համարում դերասանի ասելիքը հանդիսատեսին` լինի դա բեմից, թե կինոթատրոնի կամ հեռուստացույցի էկրանից։
- Հրանտ Թոխատյանն ունի՞ երազանք։
— Իհարկե։ Խաղալ ներկայացումներում, լավ դերեր ունենալ կինոյում։ Ավելի շատ սիրում եմ բեմը, այն ինձ ավելի հոգեհարազատ է և մոտ։
