ԵՐԵՎԱՆ, 28 հոկտեմբերի — Sputnik. 2016թ-ին «Տեղեկատվական տեխնոլոգիաների ոլորտում համաշխարհային ներդրման համար» Հայաստանի Հանրապետության նախագահի մրցանակը կշնորհվի ինտերնետի հիմնադիրներից մեկին` Open-Root կազմակերպության գլխավոր տնօրեն Լուի Պուզանուին։
Հաղթողի անունը հայտարարեցին մրցանակի հանձնաժողովի ղեկավար, նախագահի աշխատակազմի ղեկավար Արմեն Գևորգյանը, մրցանակի գործադիր խորհրդի ղեկավար Հովիկ Մուսայելյանը, ընտրական հանձնաժողովի ներկայացուցիչ Թոնի Մորոյանը և մրցանակի հովանավոր VivaCell-MTS ընկերության գլխավոր տնօրեն Ռալֆ Յիրիկյանը։
Գևորգյանի խոսքով` այդ մրցանակը ոչ միայն կնպաստի Հայաստանում ոլորտի զարգացմանը, այլ նաև` Հայաստանի և հայերի դրական բնութագրի տարածմանը արտասահմանում։
«Արդեն ունեցել ենք տարբեր երկրներից 6 մրցանակակիր։ Նրանք, բացի նրանից, որ էական նշանակություն են ունեցել իրենց խորհուրդներով ու ներդրումով, նաև դարձել են Հայաստանի բարեկամները»,- ասաց Գևորգյանը։
Հովիկ Մուսայելյանն իր հերթին նշեց, որ Լուի Պուզանուն համարվում է համացանցի 4-5 կնքահայրերից մեկը։ Նա հայտնեց, որ դափնեկիրը Հայաստան կժամանի նոյեմբերի 5-ին։
«Նոյեմբերի 7-9-ին մի շարք հանդիպումներ կլինեն ուսանողների և ոլորտի ներկայացուցիչների հետ։ Մրցանակը Պուզանուին կհանձնվի նոյեմբերի 8-ին Հայաստանի նախագահի նստավայրում կազմակերպվող հանդիսավոր ճաշի ժամանակ», — ասաց Մուսայելյանը։
Տեղեկատվական տեխնոլոգիաների ոլորտում համաշխարհային ներդրման համար Հայաստանի Հանրապետության նախագահի մրցանակը հիմնվել է երկրի ղեկավարի 2009թ. հուլիսի 6-ի հրամանագրով: Սահմանվել է, որ որպես մրցանակ շնորհվում են հուշամեդալ, վկայագիր և հուշախորհրդանիշ: Մրցանակը յուրաքանչյուր տարի շնորհվում է համաշխարհային ՏՏ ոլորտում բացառիկ ներդրումներ կատարած հեղինակավոր անհատի:
Նախկինում մրցանակի դափնեկիրներ են դարձել «Ինտել» կորպորացիայի նախկին գլխավոր տնօրեն, տնօրենների խորհրդի նախագահ Քրեյգ Բարրետը, «Apple Computer» կորպորացիայի հիմնադիր Ստիվ Վոզնիակը, Synaptics ընկերության պատվավոր նախագահ, «Ֆեդերիկո և Էլվիա Ֆաջին» հիմնադրամի նախագահ Ֆեդերիկո Ֆաջինը, Hitachi ընկերության նախկին գործադիր տնօրեն Ցուգիո Մակիմոտոն, Cisco Սիսթեմս ընկերության զարգացման գծով տնօրեն Մարիո Մացցոլան, Կասպերսկի Լաբորատորիա ընկերության գլխավոր տնօրեն Եվգենի Կասպերսկին։
