ԵՐԵՎԱՆ, 26 հոկտեմբերի — Sputnik. Ստանիսլավսկու անվան ռուսական պետական դրամատիկական թատրոնի աշխատակցի մահվան պատճառը դեռ հայտնի չէ. պարզելու համար ձեռնարկվում են անհրաժեշտ գործողություններ: Ստանիսլավսկու անվան ռուսական պետական դրամատիկական թատրոնի տնօրեն Ֆրեդ Դավթյանը Sputnik Արմենիայի հետ զրույցում նշեց, որ դեպքը տեղի է ունեցել Շեքսպիրյան փառատոնի եզրափակիչ ներկայացումից հետո. երեկ երեկոյան թատրոնի բեմում սանկտպետերբուրգյան թատրոնի դերասանները «Համլետն» են ցուցադրել:
«Աշխատակիցները հեռացել են, իսկ Աստղիկ Մուշեղյանն ինչ-ինչ պատճառներով բարձրացել է վերև, որպեսզի իջեցնի կախովի բարձրախոսները, և նա ընկել է 8 մետր բարձրությունից: Պահակասենյակում բարձր ձայն են լսել: Մեզ մոտ խստիվ արգելված է այդ գործողությունը կատարել գիշերվա ժամերին»,-ասաց նա:
Դավթյանի խոսքով` շրջանառվում է նաև այն վարկածը, որ կնոջ մոտ կարող էր ինֆարկտի կամ ինսուլտի վիճակ լինել, բայց դա կպարզի դատաբժշկական փորձաքննությունը:
ՀՀ քննչական կոմիտեն հայտնել է, որ ՀՀ ՔԿ Երևանի քննչական վարչության Կենտրոն և Նորք-Մարաշ վարչական շրջանների քննչական բաժնում կատարվում է քննություն` 1951թ. ծնված Ա.Մուշեղյանի մահվան հանգամանքները պարզելու համար:
Նախնական տվյալներով` 2016թ. հոկտեմբերի 26-ին՝ ժամը 23:00-ի սահմաններում, Երևան քաղաքի Աբովյան 7 հասցեում գործող Ստանիսլավսկու անվան թատրոնում սայթաքել և բեմի վրա ընկնելով` մահացել է 1951թ. ծնված Աստղիկ Մուշեղյանը:
Կենտրոն և Նորք-Մարաշ վարչական շրջանների քննչական բաժնում ձեռնարկվում են անհրաժեշտ գործողություններ` կնոջ մահվան պատճառը պարզելու համար:
Կատարվել է դեպքի վայրի զննություն, նշանակվել դիակի դատաբժշկական փորձաքննություն, որի եզրակացությունը դեռևս չի ստացվել: Համապատասխան հարցումներ են ուղարկվել Նարկոլոգիական և Հոգեբուժական կլինիկաներ, հանձնարարություն է տրվել ոստիկանության Կենտրոնական բաժնին՝ պարզելու դեպքի իրական հանգամանքները:
