ԵՐԵՎԱՆ, 27 հոկտեմբերի — Sputnik. Երևանի Ստանիսլավսկու անվան ռուսական թատրոնում հոկտեմբերի 26-ին 8 մետր բարձրությունից ընկած 65-ամյա աշխատակցուհուն մահացած հայտնաբերել են թատրոնի պահակները:
News.am-ի տեղեկություններով` 65 տարեկան Աստղիկ Մուշեղյանը Ստանիսլավսկու անվան ռուսական թատրոնում աշխատել է երկար տարիներ, եղել է թատրոնի հնչյունային ռեժիսորի օգնականը: Մուշեղյանը Երևանի բնակչուհի է, ամուսնացած է, ունի մեկ որդի:
Դեպքը տեղի է ունեցել գիշերը, ժամը 23-ի սահմաններում:
Տեղեկությունները հաստատել է ՀՀ քննչական կոմիտեն` նշելով, որ Կենտրոն և Նորք-Մարաշ վարչական շրջանների քննչական բաժնում ձեռնարկվում են անհրաժեշտ գործողություններ` կնոջ մահվան պատճառը պարզելու համար:
Կատարվել է դեպքի վայրի զննություն, նշանակվել դիակի դատաբժշկական փորձաքննություն, որի եզրակացությունը դեռևս չի ստացվել:
Համապատասխան հարցումներ են ուղարկվել Նարկոլոգիական և Հոգեբուժական կլինիկաներ, հանձնարարություն է տրվել ոստիկանության Կենտրոնական բաժնին՝ պարզելու դեպքի իրական հանգամանքները:
