ԵՐԵՎԱՆ, 27 հոկտեմբերի — Sputnik. Հերթական հայկական դպրոցը պլանշետներ կստանա «Թվային դարաշրջանի դպրոց» ծրագրի շրջանակում։
Այս անգամ նոր տեխնիկայով կհամալրվի Երևանի «Արգենտինայի հանրապետություն» № 76 հիմնական դպրոցը։ Windows օպերացիոն համակարգով պլանշետները տրամադրել է TSD ընկերությունը (արտադրողը` Armtab)։ Դպրոցի ընտրության հարցում իր դերն է ունեցել Հայաստանում Արգենտինայի դեսպանատունը։
Սա արդեն երկրորդ հաստատությունն է, որին Microsoft ընկերությունը պլանշետներ է տրամադրել։ Ընդհանուր առմամբ դպրոցը 5-րդ և 6-րդ դասարանի աշակերտների համար ստացել է Windows 10 օպերացիոն համակարգով աշխատող 64 պլանշետ, որոնց վրա տեղադրված են Office 3365, Classroom Mix և Minecraft ծրագրերը։
Կրթության և գիտության փոխնախարար Կարինե Հարությունյանը, որը ներկա էր պլանշետների հանձնման հանդիսավոր արարողությանը, նշել է ՏՏ ոլորտին երեխաներին հաղորդակից դարձնելու անհրաժեշտությունը։
«21-րդ դարում տեղեկատվական տեխնոլոգիաները կրթության անբաժան մասը դարձան։ Այդ տեխնոլոգիաների կիրառումը անհրաժեշտություն դարձավ նվազագույն կրթական մակարդակ ստանալու համար»,- ասաց Հարությունյանը։
Նրա խոսքով` նման ծրագիր ունի նաև կառավարությունը։ Ներկա փուլում այն իրականացվում է Վայոց Ձորի մարզում, որտեղ առաջին դասարանցիներն արդեն երկրորդ տարին է պլանշետներ են ստանում։ Համապատասխան վերապատրաստում են անցնում նաև ուսուցիչները։
Հայաստանում Արգենտինայի արտակարգ և լիազոր դեսպան Գոնսալո Ուրիոլաբեիտիան նշեց, որ այս դպրոցը պետք է մոդել հանդիսանա մյուսների համար, ինչպես նաև Հայաստանի և Արգենտինայի միջև բարեկամական հարաբերությունների խորհրդանիշ։
«Թվային դարաշրջանի դպրոց» ծրագիրը անցկացնում է Microsoft-ի, TSD-ի (Technology and Science Dynamics) հայաստանյան գրասենյակների և Conversebank-ի հետ համատեղ։
