ԵՐԵՎԱՆ, 25 հոկտեմբերի-Sputnik. ԵԱՀԿ Մինսկի խմբի ամերիկացի համանախագահ Ջեյմս Ուորլիքը վստահեցրեց, որ ղարաբաղա-ադրբեջանական սահմանին հետաքննական մեխանիզմների հարցը դրված է սեղանին։
«Մենք` համանախագահներս, կողմերին աջակցում ենք այդ հարցում։ Բյուջեին վերաբերող, հավելյալ մոնիտորներ ու դիտորդներ վարձելու հարցեր կան, հավատացնում եմ`դա հնարավոր կլինի անել»,-ասաց Ուորլիքը։
Նա անդրադարձավ նաև Բաքվում կայացած հանդիպումից հետո ադրբեջանական լրատվամիջոցների տարածած տեղեկություններին, թե իբր ամերիկացի համանախագահը կարծիք է հայտնել «օկուպացված» տարածքների վերադարձի մասին (հիշեցնենք, որ ԼՂՀ նախագահի մամուլի խոսնակ Դավիթ Բաբայանը դա անվանել էր տեղեկատվության խեղաթյուրում)։
«Մենք խոսում ենք համապարփակ կարգավորման մասին։ Դրանք այն տարրերն են, որոնք պետք է քննարկվեն։ Մենք չենք կարող առանձնացնել, տեքստից դուրս դիտարկել որևէ խնդիր։ Եթե շրջակա տարածքների վերադարձման խնդիր կա, պետք է նաև քնննարկում լինի ԼՂՀ կարգավիճակի մասին։ Այս դեպքում պետք է խոսենք փախստականների, ներքին տեղահանվածների, միջազգային խաղաղապահ ուժերի կազմի, մանադատի մասին»,-ասաց Ուորլիքը։
Այս պահին, նրա խոսքով, քաղաքական կամք է պետք կողմերին, որպեսզի բանակցություններում դիտվի իրական առաջընթաց։
Հետո նա հայտնեց իր երազանքը` որ հայերն ու ադրբեջանցիներն ապրեն խաղաղ, կողք կողքի։ Ամերիկացի համանախագահն ավելորդ չհամարեց հայ լրագորղներին հիշեցնել, որ ժամանակին հայերն ու ադրբեջանցիները հենց այդ կարգավիճակով են ապրել։
«Մեր ջանքերը, որպես միջնորդներ, ուղղված են տևական խաղաղության կարգավորմանը։ Տարածաշրջանի ժողովուրդը պետք է ապրի անվտանգության մեջ, չլինեն հակամարտություններ։ Ուզում ենք կրկնապատկել մեր ջանքերը՝ հասնելու համար այնպիսի կարգավորման, որն ընդունելի լինի բոլոր կողմերի համար։ Ես հավատացած եմ` կգա այդ օրը, երբ հայերն ու ադրբեջանցիները կողք կողքի կապրեն»,-ասաց նա։
Նա ասաց, որ բանակցությունների մաս են կազմում նաև հասարակությունների միջև շփում ստեղծելը։
Ջեյմս Ուորլիքը, այդուամենայնիվ, շրջանցեց ապրիլյան պատերազմը հրահրողների վերաբերյալ լրագրողի հարցը։ Նա հայտնեց միայն, որ մեծ ողբերգություն է տեղի ունեցել շփման գծում, իսկ մեկ զոհը չափից շատ է։
