ԵՐԵՎԱՆ, 25 հոկտեմբերի-Sputnik. Հելսինկյան եզրափակիչ ակտում զետեղված սկզբունքներն ընդունել են կողմերը, հետևաբար, դա հետագա սկզբունքների հիմքն է։ Այդ կարծիքն ունի ԵԱՀԿ Մինսկի խմբի համանախագահ Ջեյմս Ուորլիքը։ Նա ավելորդ չհամարեց հիշեցնել այդ սկզբունքները` ինքնորոշման իրավունք, տարածքային ամբողջականության նկատմամբ հարգանք, նաև հանձնառություն ուժ չկիրառելու վերաբերյալ։
«Դուք լավ գիտեք, որ Հայաստանն ու Ադրբեջանը ստորագրել էին, որ հետամուտ են իրենց հանձնառությունենրին, շարունակում ենք այդ սկզբունքներով առաջնորդվել առաջընթացի համար»,-ասաց Ուորլիքը։
Նա հիշեցրեց Վիեննայի և Սանկտ Պետերբուրգի հանդիպումները` շեշտելով, որ նախագահները հանձնառություն են հայտնել հակամարտության խաղաղ կարգավորման ուղղությամբ։ Նա չթաքցրեց, որ դեռևս կան անհամաձայնություններ։
Ջեյմս Ուորլիքը հայտենց, որ ԵԱՀԿ Մինսկի խմբի համանախագահները ողջունում են Ադբեջանի նախագահ Իլհամ Ալիևի հայտարարություններից մեկը։
«Նախագահ Ալիևը քննարկում է սկսել ԼՂՀ կարգավիճակի վերաբերյալ։ Այս թեմայով մենք պետք է ակտիվ քննարկումներ ունենանք։ Կողմերի միջև դիրքորոշումները կարող են նույնը չլինել, բայց կարևոր է, որ հարցերը հասարակության դատին ներկայացվեն Հայաստանում և Ադևբեջանում։ Ես Բաքվում ասացի, որ մենք ողջունում ենք այդ հայտարարությունը, քանի որ այդ կերպ խնդիրը քննարկման թեմա է դառնում»,-ասաց Ուորլիքը։
Նա հավելեց, որ բանակցային կարգավորման համար կարևոր են ոչ միայն նախագահների առանձնազրույցները, այլև հանրային քննարկումները։
