ԵՐԵՎԱՆ, 23 հոկտեմբերի — Sputnik. «Քաղաքացիական միություն» միջազգային հասարակական կազմակերպության կառավարման ղեկավար, լրագրող Արմեն Մարտիրոսյանը Sputnik Արմենիային ասաց, որ ուկրաինական իշխանությունների գործողությունները կապված են Ուկրաինայում պետական հեղաշրջման դեմ ուղղված իր ելույթների հետ:
Կիև-Մինսկ չվերթն իրականացնող «Բելավիա» ավիաընկերության ինքնաթիռը հոկտեմբերի 21-ին ստիպված է եղել վերադառնալ Կիևի օդանավակայան, քանի որ ուկրաինական իշխանությունները սպառնացել են կործանիչներ բարձրացնել ինքնաթիռում գտնվող «հակամայդանցի» Արմեն Մարտիրոսյանի պատճառով: Վայրէջքից հետո Ուկրաինայի իրավապահ մարմինները չվերթից հանել են Հայաստանի քաղաքացուն: Բելառուսի ԱԳՆ-ն արդեն բողոքի նոտա է հղել Ուկրաինային՝ Կիևում բելառուսական ինքնաթիռի հարկադրված վայրէջքի համար:
Ինչպես նշել է Ուկրաինայի Անվտանգության ծառայության աշխատակիցը, գերատեսչությունը տեղեկություն է ստացել, որ Կիև-Մինսկ չվերթն իրականացնող ինքնաթիռում օտարերկրյա քաղաքացի կա, որը կարող է սպառնալիք ներկայացնել ազգային անվտանգությանը:
«Ես մաքսային ու սահմանային հսկողություն անցա, մտա ինքնաթիռ… Եվ շատ զարմացա, երբ ինքնաթիռը վայրէջք կատարեց Կիևում», — Sputnik Արմենիային ասաց Մարտիրոսյանը:
Նրա խոսքով՝ վերադառնալիս նրան դիմավորել են Ուկրաինայի անվտանգության ծառայության աշխատակիցները, որոնք այդպես էլ չեն հաղորդել Մարտիրոսյանին Կիև վերադարձնելու պատճառների մասին: Մարտիրոսյանի ուղեբեռն ու իրերը մանրամասն զննել են, քանի որ անվտանգության ծառայությունը «տեղեկատվության կրիչ» է փնտրել:
«Ասացին, որ ինչ-որ տեղեկատվության կրիչ են փնտրում, բայց ես նրանց հարց տվեցի, թե ի՞նչ կրիչ պետք է հետս տանեմ 21-րդ դարում»,- ասաց Մարտիրոսյանը:
Նա կասկածում է, որ ուկրաինական դատական համակարգն անկանխակալություն կդրսևորի, բայց պատրաստվում է դատի տալ Կիևի իշխանություններին և հասնել մինչև Եվրոպական դատարան: Նրա խոսքով՝ սադրանքներն առկա են պետական հեղաշրջումից ի վեր և դրանք կշարունակվեն: Մարտիրոսյանը հայտարարեց, որ «Ուկրաինայում ապրել է 20 տարի և չի պատրաստվում խզել այդ երկրի հետ կապը»:
