ԵՐԵՎԱՆ, 23 հոկտեմբերի — Sputnik. Հայաստանի Հանրապետության քաղաքացի Արմեն Մարտիրոսյանին, որին ուկրաինական ԶԼՄ-ները ներկայացնում են որպես բլոգեր, լրագրող ու Հակամայդանի ակտիվիստ, Ուկրաինայի Անվտանգության ծառայության աշխատակիցները ձերբակալել են «տեղեկատվության կրիչի» պատճառով: Այդ մասին Մարտիրոսյանն ասել է բելառուսական TUT.by-ին տված հարցազրույցում:
Կիև-Մինսկ չվերթն իրականացնող «Բելավիա» ավիաընկերության ինքնաթիռը հոկտեմբերի 21-ին ստիպված է եղել վերադառնալ Կիևի օդանավակայան, քանի որ ուկրաինական իշխանությունները սպառնացել են կործանիչներ բարձրացնել ինքնաթիռում գտնվող «հակամայդանցի» Արմեն Մարտիրոսյանի պատճառով: Վայրէջքից հետո Ուկրաինայի իրավապահ մարմինները չվերթից հանել են Հայաստանի քաղաքացուն: Բելառուսի ԱԳՆ-ն արդեն բողոքի նոտա է հղել Ուկրաինային՝ Կիևում բելառուսական ինքնաթիռի հարկադրված վայրէջքի համար:
Ինչպես նշել է Ուկրաինայի Անվտանգության ծառայության աշխատակիցը, գերատեսչությունը տեղեկություն է ստացել, որ Կիև-Մինսկ չվերթն իրականացնող ինքնաթիռում օտարերկրյա քաղաքացի կա, որը կարող է սպառնալիք ներկայացնել ազգային անվտանգությանը:
Ուղևորը, որի պատճառով բելառուսական ինքնաթիռը վերադարձել է «Ժուլյանի» օդանավակայան, «Քաղաքացիական միություն» միջազգային հասարակական կազմակերպության կառավարման անդամ Արմեն Մարտիրոսյանն է:
«Ինձ դուրս բերեցին ինքնաթիռից անվտանգության ծառայության աշխատակիցները, ստուգեցին իմ բոլոր իրերը, ինչ-որ տեղեկատվության կրիչ էին որոնում: Հետո ոչինչ չգտան, ակտ կազմեցին այն մասին, որ ինձ մոտ անթույլատրելի բան չեն գտել, ազատ արձակեցին: Հասցրեցի մեկնել հաջորդ չվերթով»,- պատմել է Մարտիրոսյանը:
Facebook-ի իր էջում նա գրել է, որ միջադեպի մանրամասները կպատմի իրավաբանների հետ խորհրդակցելուց հետո: Մարտիրոսյանը նաև հայտարարել է, որ մտադիր է դատի տալ ուկրաինական իշխանություններին:
