ԵՐԵՎԱՆ, 22 հոկտեմբերի — Sputnik. Կարեն Կարապետյանն կառավարության գործունեության 6-ամսյա ժամանակահատվածը բնորոշել է իբրև պասիվ սպասումների շրջան` հավելելով, որ կցանկանար, որ հասարակությունը ոչ թե պասիվ դիտորդի, այլ գործընթացների մասնակցի դերում լիներ, վստահեր ու աջակցեր կառավարությանը` դրված նպատակների իրագործման գործում:
Կոռուպցիայի դեմ պայքարի հարցում Կարեն Կարապետյանն ասել է. «Կոռուպցիայի դեմ պայքարի N-երորդ կառույց ստեղծելով` կոռուպցիան չի վերանում և անհրաժեշտ է մաքսիմալ վերացնել այն միջավայրը, որը ստեղծում է այդ հնարավորությունը հարկային ու մաքսային դաշտում, թե՛ կառավարության որոշումների դաշտում, թե՛ գնումների դաշտում, թե՛ օտարերկրյա ֆինանսավորման դաշտում, թե՛ բիզնեսի համահավասար և պարզ պայմաններ ստեղծելու դաշտում»:
Պատասխանելով «Նաիրիտը» վերագործարկելու մասին հարցին՝ Կարեն Կարապետյանն ասել է, որ այս պահին նման առաջարկ կառավարությունը չի ստացել: Բայց եթե ստանա, կքննարկի միայն այն առաջարկը, որտեղ հաշվի առնված կլինեն առաջիկա 10 տարվա էներգակիրների գների կանխատեսումները, քանի որ առանց այդ ցուցանիշի խոսել գործարանի վերագործարկման մասին, ըստ վարչապետի, անլուրջ է:
Իսկ ընդհանրապես ներդրումների մասին Կարեն Կարապետյանն ասել է, որ ուզում են ներդրումային դաշտը բացել ինչպես սփյուռքահայերի, այնպես էլ այլ ազգերի ներկայացուցիչների դիմաց:
«Որպեսզի նա պաշտպանված զգա, մենք փոխադարձ կապ ենք ապահովելու՝ ի դեմս մեր Տնտեսական զարգացման եւ ներդրումների նախարարության, որը, կոպիտ ասած, անվանել ենք` բիզնեսի: Կամայական գործարար, երբ հանդիպում է որեւէ խոչընդոտի, գնում է այդ նախարարություն, եւ նախարարը ձեռքից բռնած՝ փորձում է հասկանալ»,- ասաց Կարեն Կարապետյանը` կարևորելով նաև բիզնեսի ապաքրեականացման հարցը:
Եթե լինեն լիազորությունների գերազանցման դեպքեր, դիմելու են իրավապահ մարմիններին և հետեւողական են լինելու: Խոստացավ Վարչապետը` նշելով նաև, որ ցանկանում է Հայաստանը տեսնել ավելի արդար, ավելի զարգացած, ավելի հարուստ, ավելի ապահով:
«Եթե ես կարող եմ այդ հարցում օգուտ տալ՝ ես պատրաստ եմ մինչև վերջ իմ կարողությունները դնել: Երբ զգամ, որ օգուտ չեմ տալու, մի օր ավելի չեմ մնալու: Այս պահին իմ մեջ ուժ տեսնո՞ւմ եմ, ցանկություն տեսնո՞ւմ եմ՝ այո, դրայվը չասեմ»:
