ԵՐԵՎԱՆ, 18 հոկտեմբերի — Sputnik. Վրաստանի իշխանությունները հանել են տրանսպորտի երթևեկության համար սահմանափակումները ռազմավրացական մայրուղու համար, որը Հայաստանը Վրաստանի տարածքով Ռուսաստանի հետ կապող միակ ցամաքային ճանապարհն է, գրում է Sputnik Գրուզիան։
Հունիսին սելավներից վնասված ճանապարհը շուրջօրյա բաց կլինի, եթե եղանակային պայմանները չխանգարեն։
«Դևդորակի գետի կիրճում օդի ջերմաստիճանի եղանակային փոփոխության (նվազման) հետևանքով բնական աղետների զարգացման հավանականությունը կրճատվել է, դրանից ելնելով` Մցխեթա-Ստեփանծմինդա-Լարս ավտոմոբիլային ճանապարհի 134-135կմ հատվածում տրանսպորտի երթևեկությունը 24 ժամ ազատ է»,- ասվում է Վրաստանի տարածքային զարգացման և ենթակառուցվածքի նախարարության ավտոմոբիլային ճանապարհների բաժնի կայքում։
Լարսի ճանապարհը փակվել էր հունիսի 23-ին Թերեք գետի մակարդակի բարձրացման հետևանքով: Քանդվել էր Մցխեթա-Ստեփանծմինդա-Լարս ճանանապարհի (134-135 կմ) ավելի քան 800 մետր հատվածը: Ճանապարհը կրկին բացվեց միայն հուլիսի 6-ին: Մինչ օրս այս ճանապարհով թույլատրվում էր երթևեկել միայն ցերեկային ժամերին։
