«Ժողովուրդ». ՀՀԿ-ականները հեգնել են Կարեն Կարապետյանին
«Ժողովուրդ» օրաթերթը հիշեցնում է, որ Կարեն Կարապետյանի գլխավորած կառավարությունը մինչև հոկտեմբերի 23-ը խորհրդարանի հաստատմանը պետք է ներկայացնի իր գործունեության ծրագիրը, որն արդեն քննարկվել է ՀՀԿ-ի երեկվա նիստում:
Թերթի տեղեկություններով՝ ՀՀԿ-ականները, որոնք նոր վարչապետին իրենց թիմի անդամ չեն ընկալում, պարբերաբար հեգնել են նրան: «Իսկ երբ վարչապետն ասել է, որ իրենք նախատեսում են գազի սակագինը նվազեցնել, Վարդան Այվազյանը նրան հակադարձել է, թե սակագին իջեցնել կամ բարձրացնելը կառավարության գործառույթների մեջ չի մտնում, ինչին հետևել է Կարեն Կարապետյանի կտրուկ պատասխանը, որ ինքը շատ լավ գիտի, թե կառավարության լիազորությունները որոնք են»,- գրում է թերթը:
«Հրապարակ». Շինարարական բում՝ Սամվել Կարապետյանի փողերով
«Հրապարակ»-ի տեղեկություններով, Կառավարության գործունեության ծրագրի հաստատումից հետո Սամվել Կարապետյանը 300 միլիոն դոլարի ներդրում է անելու ՀՀ տնտեսության մեջ` շինարարական բում ապահովելու և տնտեսական դաշտը մեռյալ կետից շարժելու համար:
«Սակայն, ի տարբերություն ամերիկահայ Քրք Քրքորյանի «Լինսի հիմնադրամի», «ռուսահայ» Սամվել Կարապետյանի գումարներով փորձելու են կառուցել «Հին Էրիվանը», որպես պատմամշակութային ուրույն դիմագիծ` հարակից պրոյեկտներով: Կարեն Կարապետյանի հույսը հենց այդ ծրագիրն է»,- գրում է թերթը։
«Հրապարակ»-ը նաև հիշեցնում է, որ քաղաքապետ եղած ժամանակ Կարապետյանը նման մի հուշագիր էր ստորագրել Սամվել Կարապետյանի հետ, որը, սակայն, կյանքի չկոչվեց Կարապետյանի հրաժարականի պատճառով:
«Ժողովուրդ». Գագիկ Բեգլարյանը խորհրդային բարքերը չի սիրում
«Ժողովուրդ»-ը անդրադարձել է մամուլում շրջանառող այն տեղեկություններին, թե Կապի և տրանսպորտի նախկին նախարար Գագիկ Բեգլարյանը նեղացել է ՀՀԿ վերնախավից:
Թերթի լրագրողը Բեգլարյանին հանդիպել է Թումանյան փողոցում` և «ոտքի վրա» հետաքրքրվել այդ մասին:
«Ուրեմն Ձեզ ասեմ, որ նեղանալը տղամարդուն վայել բան չի: Սա մեկ: Երկրորդ՝ ումի՞ց պիտի նեղանամ. ես թիմի անդամ եմ, ընդհանուր որոշում է կայացվել, ես իմացել եմ այդ որոշման մասին։ Էս ի՞նչ խոսակցություններ են, ինչի՞ համար, ես չեմ հասկանում»,- թերթի փոխանցմամբ ասել է Բեգլարյանը:
Իսկ թե ինչու վարչապետի հետ չի գնացել նոր նախարարին ներկայացնելու, Բեգլարյանն այսպես է պատճառաբանել. «Ես ո՛չ ՀՀ վարչապետի հետ խնդիր ունեմ, ո՛չ էլ նորանշանակ նախարարի: Ուղղակի ես այդ ձևաչափը չեմ ընդունում, կարծես խորհրդային տարիներից մնացած լինի, դրա համար էլ չգնացի: Ուրիշ բաներ, ավելորդ ենթատեքստեր մի՛ փնտրեք»:
«Հայկական ժամանակ». Համահայկական բանկում 20 000 դոլար աշխատավարձ են ստանում
«Հայկական ժամանակ» —ի տեղեկություններով, առաջիկայում մեծ փոփոխություններ են լինելու Համահայկական բանկում։ Փոխվելու է բանկի սեփականատերը, որն այժմ ՀՀ Կենտրոնական բանկն է:
«Ըստ որոշ տեղեկությունների, ԿԲ-ն փորձում է ազատվել այս կառույցից, որը, ըստ Էության, անիմաստ բեռ է իր համար։ Նախնական գաղափարով Համահայկական բանկը պետք է միջոցներ ներգրավեր բազմաթիվ աղբյուրներից և դրանք երկարաժամկետ վարկերի տեսքով տրամադրեր արտահանման ուղղվածություն ունեցող ընկերություններին։
Սակայն իր գոյության 5 տարիներին բանկը տրամադրեց 5 միլիարդ դրամից էլ պակաս վարկ, իսկ գաղափարը հիմնահատակ տապալվեց։ Փոխարենը, ըստ էության, չաշխատող այս բանկի աշխատակազմը ստանում է աստղաբաշխական աշխատավարձեր։ Իսկ բանկի ղեկավար Վահրամ Ներսիսյանցի ամսական աշխատավարձը գերազանցում է 20 հազար դոլարը»,- գրում է «Հայկական ժամանակը»:
«Հայկական ժամանակ». Պետությունը դժվարանում է կատարել պարտավորությունը
«Հայկական ժամանակ»-ին իշխանական շրջանակներից հայտնի է դարձել, որ իշխանությունները վերջին շրջանում խիստ դժվարանում են վճարել կուտակային կենսաթոշակային հատկացումները, և դա գնալով մեծ բեռ է դառնում ՀՀ պետական բյուջեի համար:
Թերթը հիշեցնում է, որ ըստ գործող մեխանիզմի, որքան էր աշխատողների աշխատավարձերից պահում կատարվում կուտակային կենսաթոշակային ֆոնդերին, նույնքան էլ որպես նպատակային սոցվճար հատկացում պետք է անի պետությունը:
«Հայկական ժամանակ»-ի տեղեկություններով մինչ օրս այդ ֆոնդերին հատկացվել է 14,7 մլրդ դրամ, որի կեսը տվել է պետությունը: Այս տարի պետությունն այդ ֆոնդերին պետք է վճարվի 26,76, իսկ 2017թ. նախատեսված է 28,68 մլրդ դրամ: «Եվ իշխանությունները տարեցտարի դժվարանում են տալ այդ գումարը: Բանն այն է, որ հարկային եկամուտները մեծ դժվարությամբ են հավաքվում և ակնհայտ է, որ այս տարի նույնպես եկամուտների հավաքագրումը թերակատարվելու է, ու այդ պայմաններում բյուջեից տարեկան 14-15 մլրդ դրամ կամ ավելի քան 30 մլն դոլար հատկացնելը լուրջ խնդիր է:
Այնուամենայնիվ վարկեր խնդրելու պատճառաբանությունների շարքում միջազգային կառույցներին նաև այս խնդիրն է ներկայացվում, որ հնարավոր լինի ավելի մեծ գումար ստանալ»,- գրում է «Հայկական ժամանակը»:
