ԵՐԵՎԱՆ, 14 սեպտեմբերի – Sputnik. ՀՀ վարչապետ Կարեն Կարապետյանն այսօր, պատասխանելով ԱԺ պատգամավորների հարցերին, հայտարարեց, որ վճռական է պայքարելու տնտեսությունում առկա ստվերի դեմ:
«Որովհետև ուրիշ ձև գոյություն չունի: Մենք հարկերը փոխելով ու բանաձևերը փոխելով` տնտեսությունը վերարտադրել չենք կարող»,-ասաց նա:
Վարչապետը նաև խոստացավ այդ պայքարի և վարած տնտեսական քաղաքականության մեջ ԱԺ-ի հետ լինել բաց, պարզ և անկեղծ:
Խաչատուր Քոքոբելյանը Կարեն Կարապետյանից հետաքրքրվեց` ինչպես է տեսնում մենաշնորհների խնդրի լուծումը։ Նորանշանակ վարչապետը նշեց, որ հայաստանյան շուկան փոքր է, և մենաշնորհային դիրքի հավանականությունը բնական է:
«Բայց եթե նա մրցունակ դաշտում է անում դա, ոչ թե ադմինիստրատիվ ռեսուրսի հաշվին, դա այլ բան է»,- ասաց վարչապետը:
