ԵՐԵՎԱՆ, 18 հոկտեմբերի — Sputnik. Ադրբեջանի ղեկավարի հայտարարությունները կարելի է դիտարկել որպես իրականությունը ոտքից գլուխ շուռ տալու հերթական փորձ, Ֆեյսբուքի իր էջում նշել է ՀՀ ԱԳՆ մամուլի խոսնակ Տիգրան Բալայանը` մեկնաբանելով Ադրբեջանի նախագահ Իլհամ Ալիևի հայտարարությունը։։
«Ադրբեջանի ղեկավարի հայտարարությունները կարելի է դիտարկել որպես իրականությունը ոտքից գլուխ շուռ տալու, բանակցային գործընթացը խաթարելու հերթական անհաջող փորձ»,- ասել է Բալայանը։
Նրա խոսքով` հենց Ալիևի կողմից ներդրվող ԵԱՀԿ Մինսկի խմբի համանախագահ երկրների նախագահների հայտարարություններում հստակ ամրագրված է, որ Լեռնային Ղարաբաղի կարգավիճակը որոշվելու է ԼՂ ժողովրդի պարտադիր իրավական ուժ ունեցող կամարտահայտության միջոցով։
«Ավելի լավ կլիներ, որ Ադրբեջանի ղեկավարությունը ինքնախաբեությամբ չզբաղվեր և թոզ չփչեր ադրբեջանական հասարակության աչքերին։ Մեկ շաբաթ առաջ Ադրբեջանի ղեկավարն արդեն հրապարակավ խոստովանել էր բանակցությունների իրական բովանդակության մասին` նշելով, որ Բաքվին հորդորում են ճանաչել ԼՂ անկախությունը»,- մեկնաբանեց Բալայանը։
Նշենք, որ Իլհամ Ալիևը ԼՂ կարգավորման հարցով հարցազրույց էր տվել «Ռոսիա սեգոդնյա» ՄԼԳ-ի գլխավոր տնօրեն Դմիտրի Կիսելյովին։
