ԵՐԵՎԱՆ, 18 հոկտեմբերի — Sputnik. Լեռնային Ղարաբաղի հակամարտության կարգավորման հարցով խելամիտ փոխզիջում հնարավոր է, տարածաշրջանը կարող է դառնալ ինքնավար հանրապետություն, ՌԻԱ Նովոստիին տված հարցազրույցում հայտարարել է Ադրբեջանի նախագահ Իլհամ Ալիևը։
«Խելամիտ փոխզիջման գնալ հնարավոր է. Լեռնային Ղարաբաղի բնակչության անվտանգության ապահովում, նրանց կենսագործունեության, ինքնավարության, տարբեր ներդրումային նախագծերի իրականացում Ադրբեջանի կողմից։ Եվ երկու ժողովուրդների միջև փոխգործակցություն՝ Լեռնային Ղարաբաղի ինքնավար շրջանից դուրս տարածքի ազատման պայմաններում, այսպես ենք մենք տեսնում հակամարտության կարգավորումը», — ասել է նա։
Ընդ որում, Ալիևի խոսքով, չի կարող փոխզիջման մասին խոսք գնալ Ադրբեջանի տարածքային ամբողջականության հարցի վերաբերյալ։
«Մենք երբեք չենք համաձայնի Լեռնային Ղարաբաղին անկախություն տրամադրել։ սակայն փոխզիջման կարող ենք գնալ տեղական ինքնավարության, Լեռնային Ղարաբաղի ինքնավարության հարցերի վերաբերյալ, ապագայում, եթե մենք պայմանավորվենք, այն կարող է ինքնավար պետություն լինել», — ավելացրել է Ադրբեջանի նախագահը «Ռոսիա սեգոդնյա» ՄԼԳ-ի գլխավոր տնօրեն Դմիտրի Կիսելյովին տված հարցազրույցի ժամանակ։
Լեռնային Ղարաբաղի ժողովուրդը իր անկախությունը հռչակել է հանրաքվեի միջոցով՝ Խորհրդային Միության օրենսդրության տառին ու ոգուն համապատասխան՝ չխախտելով որևէ օրենք և ընթացակարգ: Լեռնային Ղարաբաղի Հանրապետությունը անկախության հռչակագիրն ընդունել է 1991 թվականի սեպտեմբերի 2-ին՝ Լեռնային Ղարաբաղի մարզային և Շահումյանի շրջանային խորհուրդների համատեղ նստաշրջանի ընթացքում՝ ժողովրդական պատգամավորների կողմից։
Հայաստանի և Ադրբեջանի միջև Լեռնային Ղարաբաղի խնդրի շուրջ հակամարտությունը սկսվել է 1988թ.-ի փետրվարին, երբ Լեռնային Ղարաբաղի ինքնավար մարզը հայտարարեց Ադրբեջանական ԽՍՀ կազմից դուրս գալու մասին։ Ադրբեջանը դրան հաջորդած ռազմական հակամարտության ընթացքում կորցրեց հսկողությունը Լեռնային Ղարաբաղի նկատմամբ։
1992թ.-ից հակամարտության խաղաղ կարգավորման բանակցություններ են ընթանում ԵԱՀԿ Մինսկի խմբի շրջանակում։ Ադրբեջանը պնդում է իր տարածքային ամբողջականության պահպանումը, Հայաստանը պաշտպանում է չճանաչված հանրապետության շահերը, քանի որ ԼՂՀ-ն բանակցությունների կողմ չէ։
