ԵՐԵՎԱՆ, 16 հոկտեմբերի — Sputnik. ՈՒղիղ 222 տարի առաջ՝ 1794 թվականի հոկտեմբերի 16-ին, Հնդկաստանի Մադրաս քաղաքում տպագրվել է առաջին հայկական ամսագիրը՝ «Ազդարարը»։
«Ազդարարը» 1794-96 թվականների ընթացքում լույս է տեսել ամիսը մեկ անգամ։ Պարբերականը հրատարակել է Հարություն Շմավոնյանը։ Լույս է տեսել «Ազդարարի» 18 համար՝ 965 էջ ընդհանուր ծավալով ։
«Ազդարար»-ի լույս ընծայմամբ սկիզբ առավ հայ տպագիր մամուլի պատմությունը, որը շարունակվում է առ այսօր՝ որպես ժամանակների եւ իրադարձությունների մնայուն տարեգրություն:
Լուրերից բացի, պարբերականում տպագրվում էին նաև գեղարվեստական ստեղծագործություններ, թարգմանություններ և պատմական աշխատություններ:
Հայաստանի կառավարության 2004 թվականի ապրիլի 22-ի որոշմամբ «Մամուլի աշխատակցի» տոնը հաստատվել է որպես «Հայկական մամուլի օր» և նշվում է հոկտեմբերի 16-ին՝ «Ազդարարի» լույս տեսնելու օրը։
Պարբերականի թողարկումը վերսկսվել 2007-ին Կալկաթայում։ Այն լույս է տեսել ամերիկահայ աստղագետ Նորա Անդրեասյանի նախաձեռնությամբ։ Վերահրատարակվող «Ազդարարի» խմբագիրն է Մարտիկ Սարգսյանը։
