ԵՐԵՎԱՆ, 15 հոկտեմբերի — Sputnik. Ղազախական «ԱլմաԴԿ» ընկերությունը պատրաստ է համագործակցել հայկական կողմի հետ Հայաստանում ոչ մահացու զենք արտադրելու հարցում, Sputnik Արմենիային ասաց ընկերության տնօրեն Նուրժան Մակուլբեկը։
Սպառազինության և պաշտպանական տեխնոլոգիաների "ArmHiTec-2016" առաջին միջազգային ցուցահանդեսին նրանք ներկայացնում են ոչ մահացու արտադրանք անվտանգության ծառայությունների, առաջին հերթին` ոստիկանության, ինչպես նաև պաշտպանական գերատեսչության համար։
«Մենք արտադրում ենք նաև զինվորների վարժանքների համար պայթուցիկներ և ոչ մարտական փամփուշտներ։ Ծխային սարքերի ցանկացած տեսակ, որը կարող է օգնել զորավարժությունների ժամանակ կամ քողարկել զորքին ռազմական գործողությունների դեպքում»,- ասաց Մակուլբեկը։ Ընկերությունը Ղազախստանի ՆԳՆ հիմնական մատակարարն է, նրանք պատվերներ ունեն նաև Ուկրաինայից, Ուզբեկստանից։
Հայաստանի հետ դեռ պայմանավորվածություն չկա, սակայն ղազախ գործարարը պատրաստ է համագործակցել, այդ թվում` Հայաստանում արտադրություն սկսելու պայմանով։
«Մենք, ամենակարևորը, այդ ամենի սեփականատերն ենք։ Մեր ընկերությունը հարյուր տոկոսով մասնավոր է, և մենք կարող ենք օգտագործել մեր տեխնոլոգիաները, Հայաստանում արտադրություն սկսել կամ հավաքել սարքերը», — ասաց Մակուլբեկը։
Սպառազինության և պաշտպանական տեխնոլոգիների "ArmHiTec-2016" առաջին միջազգային ցուցահանդեսն անցկացվում է Երևանում 2016 թվականի հոկտեմբերի 13-15-ը։ Այն անցկացվում է որպես ցուցանմուշային և գործնական միջոցառումների համալիր` նպատակ ունենալով լայն զանգվածներին ներկայացնել ժամանակակից բարձր տեխնոլոգիական, նորարարական մշակումներ և պատրաստի լուծումներ` ԶՈՒ-ի կարիքներն ապահովելու համար։
