ԵՐԵՎԱՆ, 13 հոկտեմբերի — Sputnik. Սպառազինության և պաշտպանական տեխնոլոգիաների միջազգային «ArmHiTec-2016» ցուցահանդեսը կկարողանա որոշել երկրի ռազմական արդյունաբերության զարգացման վեկտորը, ասաց Հայաստանի պաշտպանության նախարար Վիգեն Սարգսյանը ցուցահանդեսի բացման ժամանակ։
Նրա խոսքով` ներկա պահին միջազգային շուկայում հայտնի և ռազմական գործողություններում փորձված սպառազինության և տեխնիկայի հետ մեկտեղ մեծ ակտիվություն է նկատվում նորարարական լուծումների ոլորտում, ինչը թույլ է տալիս նորովի լուծել ԶՈՒ դիմաց ծառացած խնդիրները, փոխել մարտական գործողությունները վարելու ձևը, բարձրացնել զինծառայողների անվտանգությունը։
««ArmHiTec»-ն ունի բոլոր հնարավորությունները դառնալու Հայաստանի ԶՈՒ շահերից բխող առաջադեմ գաղափարների և լուծումների քննարկման հեղինակավոր հարթակ, ինչպես նաև որոշելու ռազմական արդյունաբերության զարգացման հիմնական վեկտորը և խթանելու դրա զարգացումը»,- ասաց Սարգսյանը։
Նրա խոսքով` ցուցահանդեսի հիմնական շեշտը դրված է բարձր տեխնոլոգիական լուծումների վրա, առավել ևս, որ Հայաստանը միշտ առաջնային տեղ է զբաղեցրել օպտիկայի, էլեկտրոնիկայի, կիբերնետիկայի և ռադիոֆիզիկայի ոլորտներում։
«Այսօր բարձր տեխնոլոգիաների ոլորտում մենք նույնպես մեծ ներուժ ունենք պաշտպանության բնագավառում նորագույն մշակումների կիրառման և ներդրումների համար բարենպաստ պայմաններ ստեղծելու հարցում։ Հուսով եմ, որ այս ցուցահանդեսը կնպաստի տեխնիկական համագործակցության ընդլայնմանն ու մասնակից երկրների ռազմական արդյունաբերական ներուժի զարգացմանը», — ասաց Սարգսյանը։
Սպառազինության և պաշտպանական տեխնոլոգիաների միջազգային «ArmHiTec-2016» ցուցահանդեսը Երևանում անցկացվում է 2016 թվականի հոկտեմբերի 13-15-ը։
Այն անցկացվում է որպես ցուցանմուշային և գործնական միջոցառումների համալիր` նպատակ ունենալով լայն զանգվածներին ներկայացնել ժամանակակից բարձր տեխնոլոգիական, նորարարական մշակումներ և պատրաստի լուծումներ` ԶՈՒ-ի կարիքներն ապահովելու համար ժամանակակից զենքի, ռազմական տեխնիկայի և տեխնոլոգիաների արտադրության բնագավառում։
