ԵՐԵՎԱՆ, 15 հոկտեմբերի — Sputnik. «Ֆագոտ» հակատանկային հրթիռային համալիրների համար նշանոցներ է ներկայացրել ArmHiTec-2016 ցուցահանդեսի ժամանակ «Արագած» ՍՊԸ-ի տնօրեն Հովհաննես Ղարիբյանը։
«Այն թույլ է տալիս գիշերը մինչև 3500 մետր հեռավորության վրա խոցել թշնամու տանկերը։ Ընդ որում` շարժումն այդ սարքը նկատում է 5500 մետրից։ Սարքը նախագծվել ու պատրաստվել է Հայաստանում, արտասահմանից ընդամենը մի քանի սարք է բերվել»,- ասաց Ղարիբյանը։
Նրա խոսքով` անցյալ տարեվերջին սարքն առաջին անգամ փորձարկվել է, այժմ արդեն բանակի պատվերով սերիական արտադրություն է սկսվել։ Ինչ վերաբերում է արտասահմանյան նման սարքերին, ապա, Ղարիբյանի խոսքով, սարքը դրանցից էժան է երեք-չորս անգամ, միաժամանկ չի զիջում իր տեխնիկական որակով։
Սպառազինության և պաշտպանական տեխնոլոգիների ArmHiTec-2016 առաջին միջազգային ցուցահանդեսն անցկացվում է Երևանում 2016 թվականի հոկտեմբերի 13-15-ը։ Այն անցկացվում է որպես ցուցանմուշային և գործնական միջոցառումների համալիր` նպատակ ունենալով լայն զանգվածներին ներկայացնել ժամանակակից բարձր տեխնոլոգիական, նորարարական մշակումներ և պատրաստի լուծումներ` ԶՈՒ-ի կարիքներն ապահովելու համար։
