ԵՐԵՎԱՆ, 14 հոկտեմբերի — Sputnik. Իսրայել Բիլյանը Բեսլանում ավտովթարի ենթարկված ավտոբուսի վարորդ Յուրա Պողոսյանի շուրջ 30 տարվա ընկերն է: 62-ամյա վարորդը, նրա խոսքով, կյանքի կեսն անցկացրել է ավտոճանապարհներին, հիմնականում՝ Հայաստան-Ռուսաստան ուղղությամբ:
«Իր գործը շատ էր սիրում, անգամ եթե հիվանդ էլ լիներ, հենց նստում էր ղեկին, առողջանում էր»,- պատմում է ընկերը:
Իսրայել Բիլյանը չի հավատում այն վարկածին, որ վարորդը քնել է ղեկի մոտ:
«Նա շատ ուշադիր էր: Միշտ ինքն էր մեզ զգուշացնում, ասում էր՝ եթե հանկարծ քունդ տանում է, ավելի լավ է` կանգնեցրու ավտոմեքենան, քնիր, հանգստացիր, նոր շարունակիր ճանապարհդ: Ասում էր, եթե քունը տարել է, նույնիսկ եթե մենակ է եղել, ինքն էլ է այդպես արել՝ կանգնել, քնել է»,- պատմում է վարորդի ընկերը:
Յուրա Պողոսյանի ընկերոջ խոսքով` նա ավտոմեքենան մենակ չի վարել, ավտոբուսում երկրորդ վարորդ է եղել: Բացի այդ, մեր զրուցակցի խոսքով, ճանապարհի այդ հատվածում մառախուղ է եղել:
Ի դեպ, Իսրայել Բիլյանն այսօր վթարից հետո մեկնել է դեպքի վայր, որտեղ իր փոխանցմամբ համոզվել է, որ բեռնատարը, որին բախվել է ավտոբուսը, կանգնած է եղել չթույլատրված վայրում:
«Այդ ավտոմեքենան ճանապարհի մեջտեղում է կանգնած եղել, և ուժեղ մառախուղ է եղել»,- ասաց նա:
Ինչ վերաբերում է ավտոբուսի տեխնիկական վիճակին, մեր զրուցակիցը պատմեց, որ Յուրա Պողոսյանն ամեն ուղևորությունից առաջ ավտոմեքենան պարտադիր տեխնիկական ստուգման էր տանում ընկերոջ մոտ: Առողջական խնդիրներ, ընկերոջ տեղեկություններով, վարորդը ևս չի ունեցել:
Ավտոբուսի զոհված վարորդն, ընկերոջ խոսքով, կենսուրախ, աշխույժ անձնավորություն էր, որը հարազատների և ընկերների հուշերում հավերժ կմնա իր կատակներով ու ժպիտով:
Յուրա Պողոսյանն ամուսնացած էր, ուներ երկու որդի:
Վթարը տեղի է ունեցել Բեսլանի մոտ` ժամը 04:30-ին։ Մոսկվա-Երևան երթուղին իրականացնող ուղևորատար ավտոբուսը բախվել է ճամփեզրին կայանած բեռնատարին։ Ավտոբուսում 52 մարդ է եղել, գրեթե բոլորը` Հայաստանի քաղաքացիներ։
