ԵՐԵՎԱՆ, 14 հոկտեմբերի – Sputnik. Աշոտ Խաչատրյանը եղել է Բեսլանի մոտ տեղի ունեցած խոշոր ավտովթարից տուժած անձանց թվում։ Նրա խոսքով` վթարից 15 րոպե առաջ իրենք անցագրային կետում են եղել։
«Վարորդը լիովին նորմալ վիճակում էր, քնածի տպավորություն չէր թողնում։ Վթարի պահին բոլորս քնած էինք, արթնացանք բախումից»,- ասաց նա` նշելով, որ վթարի հետևանքով ոտքն ու ճակատն են վնասվել։
Հայաստան հասած ինքնաթիռի ուղևորներից մյուսն էլ Աշիկ Մարգարյանն էր, որը մեկնել էր արտագնա աշխատանքի։
«Սա առաջին ու վերջին դեպքն էր, որ ես ավտոբուսով կգնամ. շատ բաներ սխալ են արվում, օրինակ` ճիշտ չեն քնում»,- ասաց նա` չմանրամասնելով, թե ինչ նկատի ունի «ճիշտ չեն քնում» ասելով։
Ասաց, որ շատ վախեցած է, մյուս անգամ ուղևորություն կատարելու դեպքում միայն ինքնաթիռով կմեկնի։
Sputnik Արմենիայի թղթակիցը զրուցեց նաև տիկին Հասմիկի ու նրա աղջկա հետ։
«Վարորդը նյարդային վիճակում էր։ Մի քանի անգամ տեսա, որ դեղեր է խմում։ Ես ճանապարհից եմ նստել, յուրաքանչյուրիս համար 2 հազար ռուբլի ենք վճարել, գումարը հենց վարորդին ենք տվել»,- ասաց կինը։
Դուստրն էլ ասաց, որ շատ է վախեցել, իրեն թվացել է, թե ռումբ է պայթել։
Նշենք, որ վթարը տեղի է ունեցել Բեսլանի մոտ` ժամը 04:30-ին։ Մոսկվա-Երևան երթուղին իրականացնող ուղևորատար ավտոբուսը բախվել է ճամփեզրին կայանած բեռնատարին։ Ավտոբուսում 52 մարդ է եղել, գրեթե բոլորը` Հայաստանի քաղաքացիներ։ Նախնական տվյալներով` Երևան հասած մեր հայրենակիցների թվում հիվանդանոցային բուժման կարիք ունեցողներ չկան։
Տրանսպորտի և կապի նախարարությունն այժմ զբաղվում է տուժածներին տուն հասցնելու աշխատանքներով։
