ԵՐԵՎԱՆ, 14 հոկտեմբերի — Sputnik. Sputnik Արմենիան ներկայացնում է վերջին տարիներին տեղի ունեցած խոշոր ավտոպատահարները, որոնց հետևանքով հայեր են մահացել։
2016 թվական
Վորոնեժի մարզում 2016թ-ի օգոստոսի 25-ին տեղի էր ունեցել ևս մեկ ՃՏՊ, որի հետևանքով հայեր էին զոհվել։ Nissan Teana մակնիշի ավտոմեքենան դուրս է եկել ճանապարհի երթևեկելի հատվածից և կողաշրջվել։ Վթարը տեղի էր ունեցել առավոտյան 06։21-ին «Դոն» Մ-4 ճանապարհի 602-րդ կմ հատվածում։ Պատահարի հետևանքով ուղևորներից երկուսը տեղում մահացել էին, ևս երկուսը տեղափոխվել էին Վորոնեժի շրջանային հիվանդանոց։ Մահացածներն ու տուժածները հայեր էին։
2015 թվական
Տուլայի մոտ`«Դոն» Մ-4 ճանապարհահատվածում տեղի ունեցած վթարը մեծ արձագանք ստացավ։ Տուլայի մարզում վթարի էր ենթարկվել Մոսկվա-Երևան երթուղի իրականացնող ուղևորատար ավտոբուսը, որում եղել էր 63 մարդ, երկուսը` Հայաստանի քաղաքացի։ Մահացել էր ութ մարդ։
2014 թվական
20 ուղևորով և երկու վարորդով ավտոբուսը վթարի էր ենթարկվել Ստավրոպոլի երկրամասի Բուդյոնովսկի շրջանում։ Ավտովթարը տեղի էր ունեցել Մոսկվայի ժամանակով 17։05-ին։ Վարկածներից մեկի համաձայն` վթարի պատճառ էր դարձել ձախ անիվի վնասվելը։ Վարորդը չէր կարողացել կառավարել ավտոբուսը, ինչն էլ ՃՏՊ-ի պատճառ էր դարձել։
2013 թվական
Սոչի-Երևան երթուղի իրականացնող ավտոբուսը «Կովկաս» մայրուղում բախվել էր ԳԱԶ-3307 մակնիշի ավտոմեքենային, որից հետո դուրս էր եկել ճանապարհից և կողաշրջվել։ Ավտոբուսի բոլոր ուղևորները (15 մարդ) Հայաստանի քաղաքացիներ էին։
2012 թվական
Թեհրանից Երևան եկող ավտոբուսը շրջվել էր Իրանի տարածքում։ 100կմ/ժ արագությամբ ընթացող ավտոբուսի անիվը պայթել էր, ինչն էլ ավտոպատահարի պատճառ էր դարձել։ Մահացել էր 2 հայ, վնասվածքներ ստացել` շուրջ 15 հոգի։
2011 թվական
Կազբեկից Թբիլիսի ճանապարհին` Գուդաուր լեռնային հանգստավայրի մոտ տեղի ունեցած ՃՏՊ-ի հետևանքով տուժել էր 29 մարդ, որոնց թվում` Հայաստանի քաղաքացիներ։ Պաշտոնական տվյալներով` ավտոբուսը դուրս էր եկել երթևեկելի հատվածից և երկու անգամ շրջվել։ Բարեբախտաբար զոհեր չէին եղել, սակայն ուղևորները ծանր վնասվածքներ էին ստացել։
