ԵՐԵՎԱՆ, 14 հոկտեմբերի — Sputnik. Ես եղել եմ Հայաստանում ԵԱՏՄ-ին նրա միանալուց մեկ տարի ռաջ, այսօր Երևանում ընթացող Եվրասիական գործընկերության առաջին միջազգային համաժողովի շրջանակներում, պատասխանելով լրագրողների հարցերին, ասաց ՌԴ նախագահի խորհրդական Սերգեյ Գլազևը:
Նրա խոսքով, այդ ժամանակ Հայաստանում շատ էին հոռետեսական ելույթները, և ոչ բոլորն էին հավատում, որ ԵԱՏՄ անդամակցությունը մեծ հնարավորություններ կընձեռի հայաստանյան տնտեսության զարգացմանը:
«Բայց այն թվերը, որ այսօր հրապարակվեցին, վկայում են, որ Հայաստանը կարողացել է կառույցի շրջանակներում բարելավել իր տնտեսության վիճակը: Տատյանա Վալովայան այսօր հայտարարեց, որ Հայաստանից դեպի ԵԱՏՄ ատահանումն աճել է 70 տոկոսով: Այս ցուցանիշը ռեկորդային է, հետևաբար ես վստահում եմ Արա Աբրահամյանի այն լավատեսությանը, որ Հայաստանը կկարողանա դառնալ ԱԵՏՄ ինտեգրման կենտրոն: Համատարած տնտեսական անկման պայմաններում Հայաստանը առևտրաշրջանառության տնտեսական ցուցանիշներով արդեն իսկ ԵԱՏՄ ինտեգրման կենտրոնն է»,-ասաց Սերգեյ Գլազևը:
ՌԴ նախագահի խորհրդականը հույս հայտնեց հայաստանյան համաժողովի շրջանակներում լսել նաև հայ գործարարների առաջարկները՝ միացյալ շուկայի զարգացման հարցում:
Անդրադառնալով Թուրքիայի հետ Ռուսաստանի հարաբերությունների սերտացման և դրա հետևանքով Հայաստանի հնարավոր վնասների մասին հարցին, ՌԴ նախագահի խորհրդականը նախ նշեց, որ հասկանում է նշված թեմայի շուրջ մեր երկրում առկա մտահոգությունները, ապա հավելեց, որ Թուրքիայի հետ կնքված բոլոր վերջին համաձայնագրերը վերաբերում են նախկինում կնքված և քաղաքական պատճառներով սառեցված ծրագրերի վերգործարկմանը:
«Մտավախությունը, որ դրանից տուժում են Հայաստանի շահերն ու հայ-ռուսական առևտրատնտեսական համագործոկցությունը, անհիմն են: Կարծում եմ, որքան շատ լինեն նման միջազգային ինֆրակառուցվածքային ծրագրերը, այնքան ավելի մեծ զարգացման հեռանկարներ կունենա տնտեսությունը ոչ միայն ԵԱՏՄ ներսում, այլև մոտ հարևանների հետ, և այնքան ավելի մեծ կլինի քաղաքական կայունությունը»,-ասաց Գլազևը:
Լրագրողների հարցերին, թե կոնկրետ ի՞նչ պայմանավորվածություններ է նախատեսվում ձեռք բերել համաժողովի շրջանակներում, Ռուսաստանի հայերի միության նախագահ Արա Աբրահամյանը նշեց, որ քննարկման թեմա է «Նաիրիտ»-ի վերագերծարկման հնարավորությունը:
«Մենք ուսումնասիրում ենք տարբեր տեխնոլոգիաներ, որոնք կարող են կիրառվել: Ռուսական տարբեր ընկերություններ զբաղված են հայաստանյան արդյունաբերության տարբեր ոլորտներում: Իմ ամերիկյան գործընկերն այսօր հայտնեց, որ ուսումնասիրվում է հայաստանյան էներգետիկ ոլորտը՝ դրանում ավելի էժան արտադրություն կիրառելու և ավելի էժան էլեկտրաէներգիա ստանալու համար»,- ասաց Աբրահամյանը՝ հավելելով, որ արտասահմանյան շուրջ 30 ընկերություն այս պահին ՀՀ կառավարության հետ բանակցություններ է վարում:
