ԵՐԵՎԱՆ, 14 հոկտեմբերի — Sputnik. Մոսկվա-Երևան ավտոբուսում գտնված երկու երեխա գտնվում է ծանր վիճակում։ Ինչպես հայտնում է Հյուսիսային Օսեթիայի ԱԻՆ-ը, 27 մարդ տեղափոխվել է բուժհաստատություններ, նրանցից 4-ը 10-15 տարեկան երեխաներ են։
«Վլադիկավկազի մանկական հանրապետական հիվանդանոց է տեղափոխվել 4 երեխա։ Նրանցից երկուս ծանր վիճակում են։ Երկու մեծահասակների վիրահատում են շտապօգնության կլինիկական հիվանդանոցում»,- հայտնեց հանրապետության առողջապահության փոխնախարար Տատյանա Ցիդաևան։
Նրա խոսքով` տուժածներից մեկը գտնվում է աչքի հիվանդությունների կլինիկայում, շտապօգնության կլինիկական հիվանդանոցում գտնվում է հինգ մարդ` գանգուղեղային վնասվածքներով, հանրապետական կլինիկական հիվանդանոցում` 14 մարդ։
Վթարը տեղի է ունեցել Բեսլանի մոտ` ժամը 04:30-ին։ Մոսկվա-Երևան երթուղին իրականացնող ուղևորատար ավտոբուսը բախվել է ճամփեզրին կայանած բեռնատարին։ Ավտոբուսում 52 մարդ է եղել, գրեթե բոլորը` Հայաստանի քաղաքացիներ։
