ԵՐԵՎԱՆ, 14 հոկտեմբերի — Sputnik. Հյուսիսային Օսեթիայում ՃՏՊ-ի հետևանքով տուժած 4 երեխաները Ռոստովից Երևան էին գալիս` մասնակցելու մրցումների, հայտնում է ՌԻԱ Նովոստին` հղում անելով կառավարության աղբյուրին։
Ավելի վաղ ԱԻՆ-ից հայտնել էին, որ Մոսկվա-Երևան ավտոբուսի և բեռնատարի բախումից զոհվել է ՀՀ հինգ քաղաքացի, 26 անձ հոսպիտալացվել է, որոնցից 4-ը` 10-15 տարեկան երեխաներ։
Բեսլանի մշակույթի տանը ժամանակավոր կացարան է ստեղծվել, առայժմ այնտեղ կմնան նրանք, ովքեր բուժօգնության կարիք չունեն։ ՃՏՊ-ից տուժածների մեծ մասը, նախնական տվյալներով, ՀՀ բնակիչներ են։
«Չորս երեխաները Ռոստովի շրջանի բնակիչներ են, նրանք Երևան էին մեկնում մրցումներին մասնակցելու համար։ Երկուսը գտնվում են ծանր վիճակում, երկուսը` միջին ծանրության։ Զոհվածների թվում են` մեկ կին և չորս տղամարդ, բոլորը` ՀՀ քաղաքացի», — ասաց գործակալության զրուցակիցը։
Հիվանդանոցներում դեռ մնում է 9 մարդ, որոնց թվում` հինգ մեծահասակ և չորս երեխա։ Ժամանակավոր կացարանում քաղաքացիների թիվն ավելացել է, այժմ այնտեղ 27 մարդ է գտնվում, նշում են կառավարությունում։
