ԵՐԵՎԱՆ, 13 հոկտեմբերի — Sputnik. Փոխարտգործնախարար Շավարշ Քոչարյանը հայտնեց`քանի որ կառավարության որոշմամբ ԱԳՆ հաստիքացուցակում ավելացվել է ևս մեկ փոխնախարարի հաստիք, հետևաբար առաջարկվում է մեկ բջջային հեռախոս հատկացնել։ Վարչապետ Կարեն Կարապետյանը դիմեց կառավարության աշխատակազմի ղեկավար-նախարար Դավիթ Հարությունյանին` ինչպե՞ս անել, որ նման հարցերն օրակարգ չմտնեն։ Այնուհետև հիշեցրեց, որ պետք է որոշումների ապակենտրոնացում անել։
«Կան բաներ, որ պահանջելու են օրենսդրական մեծ փոփոխություններ, դրա համար կառաջարկեի քննարկել նույն մոդելը, ինչ կոմիտեներում ենք մենք անցկացնում, որ տեխնիկական բնույթի հարցերն առանց քննարկման դրվեն նիստի, որևէ մեկն առարկի, նոր քննարկվեն։ Եթե այդ համաձայնությունը լինի, ապա մենք պետք է նախապատրաստենք նախագահի հրամանագրի փոփոխություն, որտեղ նախատեսենք նման հնարավորությունը»,-ասաց Հարությունյանը։
Կարեն Կարապետյանն իր հերթին հորդորեց հարցը տանել երկու ուղղությամբ` մեկը Դավիթ Հարությունյանի առաջարկն է, մյուսն էլ այն, որ նման հարցերը չպետք է մտնեն կոմիտեներ։
