ԵՐԵՎԱՆ, 13 հոկտեմբերի — Sputnik. Հայաստանի պաշտպանության նախարար Վիգեն Սարգսյանը հինգշաբթի ընդունել է ՀԱՊԿ-ի միացյալ շտաբի պետ, գեներալ-գնդապետ Անատոլի Սիդորովին, ինչպես նաև ՌԴ ռազմատեխնիկական համագործակցության դաշնային ծառայության տնօրեն Ալեքսանդր Ֆոմինին, հայտնում են ՀՀ պաշտպանության նախարարությունից։
ՀԱՊԿ-ի միացյալ շտաբի պետ, գեներալ-գնդապետ Անատոլի Սիդորովի հետ հանդիպումների ընթացքում քննարկվել են հոկտեմբերի 14-ին Երևանում կայանալիք ՀԱՊԿ անդամ պետությունների Հավաքական անվտանգության խորհրդի և կանոնադրային մարմինների նիստերի օրակարգի հարցերը: Առանձնակի ուշադրության են արժանացել ՀԱՊԿ միացյալ շտաբի գործունեության կատարելագործմանն ուղղված, ինչպես նաև ՀԱՊԿ-ի ռազմական բաղադրիչի հետագա զարգացման խնդիրները:
ՌԴ ռազմատեխնիկական համագործակցության դաշնային ծառայության տնօրեն Ալեքսանդր Ֆոմինի հետ հանդիպմանը, որին մասնակցել է նաև ՀՀ-ում ՌԴ արտակարգ և լիազոր դեսպան Իվան Վոլինկինը, քննարկվել են երկկողմ ռազմատեխնիկական համագործակցության ընթացիկ խնդիրներն ու հեռանկարները:
Ալեքսանդր Ֆոմինը, մասնավորապես, նշել է ոլորտում համատեղ ծրագրեր իրականացնելու լայն հնարավորությունների և դրանք կյանքի կոչելու պատրաստականության մասին և այս առումով կարևորել է Հայաստանում սպառազինության և պաշտպանական տեխնոլոգիաների «ԱրմՀայՏեք» միջազգային ցուցահանդեսի անցկացումը:
ՀՀ պաշտպանության նախարար Վիգեն Սարգսյանն իր հերթին ընդգծել է վերջին տարիներին Հայաստանում կուտակված զգալի գիտակրթական ներուժի, տնտեսապես շահավետ նոր մշակումների մասին, որոնք ոչ միայն պաշտպանության ոլորտում օգտագործելու, այլև միջազգային շուկաներ դուրս գալու հեռանկարներ ունեն:
Կողմերը քննարկել են նաև ռազմատեխնիկական համագործակցության ոլորտում ձեռք բերված պայմանավորվածությունները և գոհունակություն հայտնել դրանց կատարման ընթացքի վերաբերյալ:
Հանդիպման ավարտին ՀՀ պաշտպանության նախարարի առաջին տեղակալ Դավիթ Տոնոյանը և ՌԴ ռազմատեխնիկական համագործակցության դաշնային ծառայության տնօրեն Վլադիմիր Դրոժովը ստորագրել են ռազմատեխնիկական համագործակցությունը կարգավորող Լրացուցիչ արձանագրություն:
ՀՀ պաշտպանության նախարար Վիգեն Սարգսյանը և ՌԴ ռազմատեխնիկական համագործակցության դաշնային ծառայության տնօրեն Ալեքսանդր Ֆոմինը ստորագրել են «Հայաստանի Հանրապետության և Ռուսաստանի Դաշնության միջև ռազմատեխնիկական համագործակցության զարգացման մասին» պայմանագրի իրականացման կարգի մասին Համաձայնագիրը:
