ԵՐԵՎԱՆ, 13 հոկտեմբերի — Sputnik. Գյուղատնտեսության նախարար Իգնատի Առաքելյանը հոկտեմբերի 5-ին աշխատանքային այցով մեկնել էր Մոսկվա ալկոհոլային խմիչքների արտահանումների հետ կապված բանակցություններ վարելու համար։ Նախարարն առաջարկել է, որ Հայաստանից արտադրանքը դուրս գա մեկ բրենդով։
«Այսօր խնդիր կա, որ շատ են փոքր արտադրողները, որոնք ունեն տեխնիկական խնդիրներ ռուսական շուկա մտնելու համար։ Ռուսաստանի խոշոր ցանցերն ուզում են մեծ քանակություն, կայուն որակ և կայուն մատակարարում։ Մեր փոքր և միջին ընկերությունների համար դա դժվար է»,- ասաց Առաքելյանը։
Նա տեղեկացրեց, որ ավելի վաղ նպատակ է եղել Ռուսաստանում ստեղծել հայկական արտադրանքների իրացման բազա։
«Ռուսաստանի մարքեթինգի և Հայաստանի գործարարների միասնական որոշում է պետք։ Կա գաղափար, դրա շուրջ բոլորը պետք է միավորվեն ու համաձայնեն»,- ասաց նա։
Նախարարը ընդգծեց, որ, ի վերջո, այդ միասնական բրենդով հանդես գալու գաղափարի շուրջ պետք է միավորվեն նախ հայ արտադրողները և համաձայնեն հանդես գալ նման ձևաչափով։
