ԵՐԵՎԱՆ, 12 հոկտեմբերի — Sputnik. Հայաստանի Ազգային ժողովի նախագահ Գալուստ Սահակյանը ծննդյան 90-ամյակի առթիվ շնորհավորական ուղերձ է հղել ՌԴ ֆուտբոլային միության առաջին փոխնախագահ Նիկիտա Սիմոնյանին, հայտնում են ԱԺ մամուլի ծառայությունից։
Սահակյանը նշել է, որ այս հոբելյանը ոչ միայն անձամբ Սիմոնյանի, այլև նախկին խորհրդային տարածքի և առանձնապես հայաստանցի ֆուտբոլասերների, ֆուտբոլիստների ու մարզիչների մի քանի սերունդների հոբելյանն է:
«Հայկական ֆուտբոլի ամենահիշարժան ժամանակահատվածը, որն այսօր էլ բոլորս հիշում ենք հպարտությամբ և որն այսօր համարում ենք ցանկալի երազանք, կապված է հենց Ձեր անվան ու կենսագրության հետ: Ձեր գլխավորությամբ ավելի քան 40 տարի առաջ Երևանի «Արարատը» նվաճել է այնպիսի բարձունք, որն առայսօր անգերազանցելի է մեր ֆուտբոլի համար, իսկ Դուք՝ որպես ֆուտբոլի լեգենդ, մնում եք հայկական ֆուտբոլի պատմության առանցքը` նշանակալի ավանդ և ծանրակշիռ ձեռքբերումներ արձանագրելով այդ մարզաձևի զարգացման գործում»,- ասված է շնորհավորական ուղերձում:
Ազգային ժողովի նախագահը հոբելյարին մաղթել է առողջություն, արևշատություն և ամենայն բարիք։
Նիկիտա Սիմոնյանը ԽՍՀՄ վաստակավոր մարզիկ է, ԽՍՀՄ վաստակավոր մարզիչ, «Հայրենիքի հանդեպ ծառայությունների» շքանշանակիր։ Համարվում է Մոսկվայի «Սպարտակի» բոլոր ժամանակների լավագույն ռմբարկուն` խփած — 160 գնդակով։ Նա եղել է լեգենդար «Արարատ–73»-ի մարզիչը։
2011 թ. մարտի 21-ին ՀՀ նախագահի հրամանագրով Հայ-ռուսական բարեկամության ամրապնդմանն ուղղված գործունեության, ինչպես նաև հայկական ֆուտբոլի զարգացման գործում ներդրած նշանակալի ավանդի և ունեցած ծանրակշիռ ձեռքբերումների, ֆուտբոլի ասպարեզում երկարամյա արդյունավետ աշխատանքի համար պարգևատրվել է Պատվո շքանշանով։ 2013 թ. հոկտեմբերի 10-ին Հայկական ֆուտբոլի զարգացման գործում ներդրած նշանակալի ավանդի և ձեռք բերած փայլուն նվաճումների համար պարգևատրվել է Հայրենիքին մատուցած ծառայությունների համար» 1-ին աստիճանի մեդալով։
