ԵՐԵՎԱՆ, 12 հոկտեմբերի — Sputnik. Ռուսաստանի լրագրողների միության անդամ Ալեքսանդր Երշովն իր գրառումներում նկարագրում է ոչ թե Հայաստանի տեսարժան վայրեր կատարած իր ճամփորդությունները, այլ ցույց տալիս այն Հայաստանը, որը նա բացահայտել է, ծանոթացնում ընթերցողին հասարակ մարդկանց հետ, հայտնում է карелinform-ը։
Հեղինակի ճամփորդական նոթերի քննարկումը տեղի ունեցավ «Հյուսիսի» ("Север") խմբագրությունում։
«Ես դիմեցի նախարարություն, այնտեղ ինձ միացրեցին Գեղամ Մկրտչյանի` հայկական սփյուռքի ղեկավարի հետ, նա միանգամից զանգահարեց Հայաստանում գտնվող իր ընկերներին, ծանոթացրեց ինձ լավ մարդկանց հետ, ովքեր հետագայում դարձան նաև իմ ընկերները։ Այսպես համատեղ ջանքերով կարողացանք տեսնել և իմանալ այն, ինչն այլ պարագայում անհնար կլիներ։ Օրինակ, թե ինչպես է գեղարդը, որով խոցել են Հիսուս Քրիստոսին, հայտնվել Հայաստանում, ինչպես է Սևանում հայտնվել Լադոգա լճի ձկնատեսակը, ինչ է խաչքարը, Հայաստանի հին վանքերի լեգենդները և ինչու է Ամերիկան Հայաստանում աշխարհում մեծությամբ երկրորդ դեսպանատունը բացել», — ասաց Երշովը։
Երշովը ճամփորդական գրառումներ է արել նաև Խորվաթիայի, Իտալիայի, Չերնոգորիայի, Բոսնիայի և Հերցեգովինայի, Ալբանիայի, Բելառուսի մասին, որոնք նույնպես հրապարակվել են «Հյուսիսի» էջերում։
«Ալեքսանդր Երշովի ստեղծագործական ձեռագրի առանձնահատկությունը գունեղ գրելու կարողությունն է։ Երբ կարդում ես նրա նյութերը, ոչ միայն տեղեկություն ես ստանում պատմական հուշարձանների մասին, այլև զգում հոտերն ու լսում ձայները։ Ընթերցողը զգում է թարմ թխած լավաշի, այն բանջարեղենների ու մրգերի բուրմունքը, որոնց մասին գրում է հեղինակը։ Նա ստեղծում է այդ երկրում ներկայության զգացողություն։ Կարդում ես Հայաստանի մասին ու կարծես Ալեքսանդրի հետ միասին քայլում ես հայկական փողոցներով, համտեսում ավանդական ուտեստները», — ասաց «Հյուսիս» ամսագրի գլխավոր խմբագիր Ելենա Պիետիլյայնենը հեղինակի հետ ամսագրի խմբագրությունում հանդիպման ժամանակ։
Ճամփորդական նոթերի ստեղծումը հնարավոր դարձավ հայկական համայնքի, Կարելիայի ազգային քաղաքականության հարցերի, հասարակայնության հետ կապերի և կրոնական միավորումներով զբաղվող նախարարության հետ համագործակցության շնորհիվ։
