ԵՐԵՎԱՆ, 12 հոկտեմբերի — Sputnik. Եվրասիական գործընկերության միջազգային առաջին ֆորումը կոչված է իրական ժամանակի ռեժիմում մշտական հաղորդակցման, քննարկման և համագործակցման համար հարթակ ստեղծել, ինչը կհեշտացնի ԵՏՄ-ի փոխակերպումը «Խելացի տարածաշրջանի» (Smart Region), գրված է Ֆորումի կայքում։
«Եվրասիական գործընկերության միջազգային ֆորումը ԵՏՄ-ում և նրա սահմաններից դուրս ինտեգրման գործընթացներն ամրապնդելու և զարգացնելու ամենատարբեր տնտեսական նախագծերի իրականացման համար նոր հնարավորությունների ստեղծման մշտական գործող հարթակ է», — ասել է ֆորումի համակարգող կոմիտեի նախագահ, ՅՈՒՆԵՍԿՕ բարի կամքի դեսպան Արա Աբրահամյանը։
Երևանում ֆորումին կմասնակցեն ԵՏՄ և եվրասիական տնտեսական ինտեգրմամբ շահագրգիռ այլ երկրների, ինչպես նաև խոշոր բիզնեսի, հայկական սփյուռքի և գիտական աշխարհի ներկայացուցիչները։
««Արտադրված է Հայաստանում» գրառումը պետք է ճանաչելի և սպասվող դառնա։ Հայկական կոնյակը պետք է լրացվի հայկական գյուղմթերքով, հանքային արտադրանքով, ինչպես նաև հայկական ՏՏ-տեխնոլոգիաներով, ռազմարդյունաբերական նորույթներով, ոսկերչական իրերով, որակյալ կրթությամբ, զբոսաշրջությամբ, բժշկությամբ, շինանյութերով, ֆինանսաբանկային համակարգով և հայրենական արտադրության մի շարք այլ ապրանքներով», — նշել է Աբրահամյանը։
Ֆորումին ներկա կլինեն նաև ԵՏՄ անդամ երկրների կառավարությունների բարձրաստիճան ներկայացուցիչները, ինչպես նաև գործարար շրջանակների ներկայացուցիչներ ԱՄՆ-ից, Չինաստանից, Հարավային Կորեայից, Հնդկաստանից, Իրանից, Վրաստանից, Մեծ Բրիտանիայից, Գերմանիայից, Իտալիայից և այլ երկրներից։
Ֆորումին կմասնակցեն նաև Հայաստանի վարչապետ Կարեն Կարապետյանը, Եվրասիական տնտեսական հանձնաժողովի կոլեգիայի նախագահ Տիգրան Սարգսյանը, ՌԴ նախագահի խորհրդական Սերգեյ Գլազևը։
Ֆորումն աջակցում է երկկողմ և բազմակողմանի տնտեսական համագործակցությանը և ԵՏՄ, ԱՊՀ, BRICS հինգ անդամների (Բրազիլիա, Ռուսաստան, Հնդկաստան, Չինաստան, ՀԱՀ), ՇՀԿ, ԵՄ, ԱՄՆ-ի և այլ երկրների միջև բիզնես գործողությունների իրականացմանը։
