ԵՐԵՎԱՆ, 10 հոկտեմբերի — Sputnik. Հայտնի ռեժիսոր, դերասան և սցենարիստ Տիգրան Քեոսայանը կարծում է, որ առօրյա կյանքում մեզ հումորն է պակասում։ Այս մասին նա ասել է «Ստոլիցա» լրատվական գործակալությանը տված հարցազրույցում։
«Դժվար է կատակել հատկապես այն թեմաներով, որոնց մասին բոլորը սովոր են լուրջ խոսել, չափից ավելի լուրջ և նույնիսկ մի փոքր ատելությամբ։ Այդ պատճառով էլ ուզում ես հանդիսատեսին օգնել, որ հասկանա այդ թեմաները, դրանց ժպիտով ու հեգնանքով նայի», — ասում է նա։
Քեոսայանը սեպտեմբերի սկզբից НТВ հեռուստաալիքի եթերում նոր զվարճալի երեկոյան հեռուստաշոու է վարում։ Ամեն շաբաթ օր Տիգրան Քեոսայանն իրեն բնորոշ հումորով պատմում է համաշխարհային իրադարձությունների մասին։
Ռեժիսորը նշում է, որ աշխարհին ժպիտով նայելը դժվար է։
«Ինձ համար կարևոր է, թե որքանով ես զգում լսարանին, նա էլ` քեզ, որքանով ես դու ուղեղդ կորցրել` մասա՞մբ, քառո՞րդ չափով, թե՞ ընդհանարապես չես կորցրել։ Իհարկե, բոլորս վերջին տարբերակի հույս ունենք», — ասել է նա։
Քեոսայանը հայտնել է նաև, որ այժմ աշխատում է «Դերասանուհի» հեռուստանովելի նկարահանումների վրա։
«Անհավանական դետեկտիվ է` ռուսական գավառական քաղաքին բնորոշ մանրամասներով։ Դետեկտիվն ինձ համար այդքան էլ սովորական ժանր չէ, սակայն ես կարդացի սցենարը և մինչև վերջ էլ չկռահեցի, թե ով է մարդասպանը և հասկացա, որ պետք է նկարահանել։ Բացի այդ, մենք այդ սերիալում ավելի շատ կինոյի մթնոլորտ ենք ստեղծել։ Շատ եմ սպասում նկարահանումների մեկնարկին։ Հաջորդ տարի գարնանն էլ պլանավորել ենք լիամետրաժ ֆիլմի նկարահանումները, այժմ սցենարի վրա ենք աշխատում», — ասել է ռեժիսորը։
Հարցին, թե ինչն է նրան ոգեշնչում, Քեոսայանը պատասխանել է. «Կյանքը։ Սերը։ Շփումը։ Ընտանիքը, մեզ շրջապատող դրական ամեն բան»։
