ԵՐԵՎԱՆ, 21 փետրվարի- Sputnik. Դերասանը վերջերս իր ուժերն է փորձել դրամատիկ դերում. նա մարմնավորել է մի դատավորի, որի երկվորյակ եղբայրը կոմայի մեջ է: Մկոն խոստովանեց, որ ֆիլմի ռեժիսոր Մհեր Մկրտչյանը գովել է իր խաղը:
«Ցանկացած կատակերգական դերասան ցանկանում է փորձել իր ուժերն այդ ոլորտում: Դժվար է կատակերգական ամպլուայից հեռանալը, եթե երկար ժամանակ հանդես ես եկել հենց այդ ժանրում: Կարծում եմ, որ դա պետք է շատ զգույշ և նուրբ անել՝ հանդիսատեսի ընկալումը չվիրավորելու համար, որը սովոր է տեսնել քեզ այլ դերում»,- ասաց դերասանը:
Խոսելով դերերի ընտրության մասին՝ Մկրտիչ Արզումանյանը նշեց, որ որոշում ընդունելու համար պետք է ծանոթանալ սցենարին, թեև երբեմն դերասանին ուղարկում են միայն նրա մասնակցությամբ տեսարանները: «Պետք է կարդալ ողջ սցենարը՝ յուրաքանչյուր բառին ծանոթանալու համար, որից հետո քո նշումներն ես անում: Հետո սկսվում են երկար ու դաժան փորձերը, մինչև գտնվում է այն կերպարը, որը քեզ հետ զուգահեռ սկսում է ապրել»,- նշեց Արզումանյանը:
Այն հարցին, թե ինչպիսի ֆիլմում երբեք չի նկարահանվի, Մկոն կատակում է. «Սկզբի համար մի կողմ թողնենք «18+» ձևաչափը»:
Ինչպես մարզիկները, այնպես էլ դերասաններն ամեն օր մարզվում են, և Արզումանյանը բացառություն չէ: Կան խոսքի պարտադիր վարժություններ, որոնք նա ամեն օր կատարում է եթերից և նկարահանումներից առաջ: Ինչ վերաբերում է կերպարներին, ապա դերասանը խոստովանում է, որ հատկապես դժվար են տրվել բժշկի և ճանապարհային ոստիկանության աշխատակցի կերպարները:
«Կարգին հաղորդում» հումորային ծրագրի մանրապատումների ժամանակ հաճախ էի հանդես գալիս այդ դերերում և ամեն անգամ պետք է նոր կերպար գտնեի»,- պատմում է դերասանը: Կերպարի մեջ մտնելու համար դերասանը սկզբից փորձում է հասկանալ, թե ինչպիսին է այդ կերպարը կյանքում, ինչպես է խոսում, ինչի մասին է մտածում: Շատ երկխոսություններ, կատակներ ծագել են հենց նկարահանման հրապարակում և սցենարով նախատեսված չեն եղել: Առաջիկայում եթեր դուրս կգա Մկոյի մասնակցությամբ նոր նախագիծը:
Այն կլինի հումորային շոուի ձևաչափում: Կան նաև այլ նախագծեր, որոնք պատրաստ կլինեն հաջորդ դարի: Արզումանյանի մասնակցությամբ վերջին ֆիլմը եղել է «Փախի՛ր կամ ամուսնացի՛ր» կինոնկարը:
«Մենք ընկերներով որոշեցինք ֆիլմ նկարահանել: Շուրջ մեկ տարի աշխատեցինք սցենարի վրա: Հավաքվեց լավ կազմ, հուսալի մարդիկ, որոնց հետ ուր ասես կարելի է գնալ»,- ասում է դերասանը:
Նոր ֆիլմը, որտեղ գլխավոր դերերում հանդես են գալիս Մկոն ու Իվետա Մուկուչյանը, էկրան կբարձրանա մարտի 3-ին, և ինչպես խոստովանում է դերասանը, ինքն անհամբերությամբ է սպասելու ֆիլմի մասին կարծիքներին: Չնայած դերասանական ծանրաբեռնված առօրյային՝ Մկոն ժամանակ է գտնում նաև կարդալու համար: Շատ է կարդում, կարող է միաժամանակ չորս գիրք ընթերցել: Նրան հետաքրքրում են տարբեր գրական ժանրերը, փորձում է կարճ ժամանակահատվածում հնարավորին չափ շատ տեղեկություն ստանալ:
Արզումանյանը խոստովանեց, որ սիրում է Բեռնարդ Շոուի կատակերգությունները: Սիրում է դասական կինոն: Վերջին շրջանում Մկոն սկսել է մտածել ռեժիսորի կարիերայի մասին, բայց համոզված է, որ դեռ պատրաստ չէ, քանի որ «փորձը չի հերիքում»: Սակայն դերասանը հուսով է, որ շուտով այդ բարձունքն էլ կգրավի:
