ԵՐԵՎԱՆ, 10 հոկտեմբերի — Sputnik. Հայաստանի նախագահ Սերժ Սարգսյանի հրամանագրով Վարդան Հարությունյանը նշանակվել է ՀՀ կառավարությանն առընթեր Պետական եկամուտների կոմիտեի նախագահ:
Նախագահի մեկ այլ հրամանագրով Հովհաննես Հովսեփյանն ազատվել է ՀՀ կառավարությանն առընթեր Պետական եկամուտների կոմիտեի նախագահի պաշտոնից։
Վարդան Ռուբենի Հարությունյանը ծնվել է 1975թ. հունվարի 1-ին, ավարտել է Երևանի ժողովրդական տնտեսության ինստիտուտը՝ ստանալով տնտեսագետի որակավորում:
Տնտեսագիտության թեկնածու է:
1994-1999թթ. աշխատել է Աբովյանի թթխմորի գործարանում հերթափոխի պետ, արտադրամասի պետի տեղակալ: 1999-2000թթ. եղել է «Կոտայքգազ» ԳԳՄ Աբովյանի արտադրա-շահագործման ծառայության (ԱՇԾ) պետի տեղակալ, ծառայության պետ: 2000-2002`«ՀայՌուսգազարդ» ՓԲԸ Աբովյանի ԳԳՄ տնօրեն: 2002-2009` «ՀայՌուսգազարդ» ՓԲԸ Երևանի ԳԳՄ տնօրեն:
2009-2010թթ. Հարությունյանը եղել է «ՀայՌուսգազարդ» ՓԲԸ գլխավոր տնօրենի տեղակալ` կոմերցիայի և արտաքին կապերի գծով, 2010-2011-ին` «ՀայՌուսգազարդ» ՓԲԸ Գլխավոր տնօրենի ժամանակավոր պաշտոնակատար: 2011-2014` «ՀայՌուսգազարդ» ՓԲԸ-ի վարչության նախագահ-գլխավոր տնօրեն։
2014-ից առ այսօր «Գազպրոմ Արմենիա» ՓԲԸ-ի վարչության նախագահ-գլխավոր տնօրեն է, «Գազպրոմ Արմենիա» ՓԲԸ տնօրենների խորհրդի անդամ, նույն ընկերության վարչության անդամ:
ՀՀ նախագահի հրամանագրով պարգևատրվել է «Անանիա Շիրակացու» մեդալով:
