ԵՐԵՎԱՆ, 28 սեպտեմբերի — Sputnik. ՊԵԿ նախագահ Հովհաննես Հովսեփյանն այսօր շտապ հեռացավ ԱԺ-ից` խուսափելով լրագրողների հարցերից: ՊԵԿ-ը երկու առանձին կառույցների` հարկային և մաքսային մարմինների բաժանելու հնարավորության, իր պաշտոնավարման և նույնիսկ հարկային նոր օրենսգրքի մասին հարցերը մնացին անպատասխան: ՊԵկ նախագահը միայն մի քանի նախադասությամբ արձագանքեց լրագրողներին` ասելով. «Հարկային օրենսգիրքը հիմա քննարկվում է, թողեք քննարկվի, ավարտվի: Սովորաբար յուրաքանչյուր գործարար, երբ որ հարկ է վճարում, դժգոհում է»:
Լրագրողների հարցերին Հովսեփյանը պատասխանեց ԱԺ-ի աստիճաններն իջնելով: Դռնից դուրս գալով էլ ասաց` թողեք գնամ, և շտապ հեռացավ:
Իսկ Ազգային ժողովում, ի դեպ, այդ պահին քննարկում էր հենց Հովսեփյանի աշխատավարձի հարցը:
«Պետական պաշտոններ զբաղեցնող անձանց վարձատրության մասին» օրենքում փոփոխություններ կատարելու մասին նախագծով կառավարության առաջարկած բոլոր փոփոխությունները վերաբերում են ՊԵԿ նախագահին, նրա տեղակալներին ու կոմիտեի մի քանի այլ պաշտոնյաների: Մասնավորապես` առաջարկվում է օրենքում վերականգնել ՊԵԿ նախագահի և տեղակալների, մի շարք այլ պաշտոնյաների մասին դրույթները այնպես, ինչպես դրանք եղել են մինչև ֆինանսների նախարարության կազմում ներառելը: Նախագիծը նաև նախատեսում է օրենքից հանել պետական և ծառայողական գաղտնիքին տիրապետելու համար նախատեսված հավելումները:
