ԵՐԵՎԱՆ, 9 հոկտեմբերի — Sputnik. Հայաստանում պանիր արտադրող խոշորագույն ընկերություններից մեկի աղաջրային ավազաններում հասունանում է հայտնի գաուդա պանրի նոր խմբաքանակը, հաղորդում է vesti.ru-ն: 2014թ-ին Ռուսաստանի Դաշնության կողմից եվրոպական ապրանքների վրա պարենային էմբարգո սահմանելուց հետո այստեղ գրեթե երեք անգամ ավելացրել են արտադրվող ապրանքի տեսականին և ծավալը: Հայ պանրագործների հին գործընկերներն ու նոր հաճախորդները գնահատում են հայկական պանրի համը, որը ստանում են ծովի մակարդակից 1800 մետր բարձրության վրա արածող կովերի կաթից:
Ընկերությունը սկսել է պանիր արտադրել 2006թ-ից: Այսօրվա դրությամբ տեսականու մեջ ներառված է պանրի 10 տեսակ:
«Պանրի ազգային տեսակներից բացի, մենք արտադրում ենք նաև եվրոպական պանիրներ՝ «Գաուդա», «Մոցառելա», «Ֆետա»», — ասում է «Դուստր Մարիաննա» ՍՊԸ-ի որակի հսկողության ռուսական տեղակալ Քրիստինա Կարապետյանը:
Հայաստանի գյուղատնտեսության նախարարության վիճակագրության համաձայն՝ Հայաստանից կաթնամթերք ներկրելու ծավալներով Ռուսաստանն առաջին տեղում է: 2015թ-ին հյուսիսային հարևանին առաքվել է 9 հազար տոննա ազգային և եվրոպական պանիրներ, այս տարի այդ թիվն ավելի մեծ կլինի: Միաժամանակ կառավարությունը որոշել է խթանել պանրի արտադրության ընդլայնումը:
«Հիմա երկրում իրագործվում է երկու ծրագիր: Դրանցից մեկի համաձայն՝ Եվրոպայից Հայաստան են ներկրվում կովերի նոր ցեղատեսակներ, որոնք տարբերվում են բարձր արտադրողականությամբ: Երկրորդ ծրագիրը կոոպերատիվ ֆերմերային տնտեսությունների զարգացումն է: Երկու նախագիծն էլ թույլ են տալիս կտրուկ ավելացնել կաթի արտադրությունը», — ասել է ՀՀ գյուղատնտեսության նախարարի տեղակալ Ռոբերտ Մակարյանը:
Ռուսաստանի և Հայաստանի պանրային ապրանքաշրջանառության վրա ազդում են նաև այն պայմանները, որոնք ստեղծվել են ԵՏՄ անդամ երկրների համար: Զգալիորեն հեշտացվել է մաքսային փսատաթղթերի ձևակերպման ընթացակարգը, ներմուծվել է փաստաթղթերն էլեկտրոնային եղանակով ներկայացնելու համակարգ:
Հայ պանրագործներն էլ վստահ են, որ այսօր արդեն պատրաստ են գոհացնել Ռուսաստանի անգամ ամենաքմահաճ պանրասերներին:
«Հայաստանում բավական լավ է զարգացած պանրի արտադրությունը, ավելի լավ, քան ԽՍՀՄ նախկին հարևան պետություններում: Բայց մենք այդքանով չենք բավարարվելու և շարունակելու ենք զարգացնել ոլորտը: Հայաստանում պանիր արտադրողները շատ են, բայց, ցավոք, միայն չորս ընկերություն է պանիրն արտահանում Ռուսաստան: Իսկ դա շատ քիչ է», — նշել է Հայաստանի Պանիր արտադրողների միության նախագահ Արմեն Գիգոյանը:
Առայժմ դժվար է ասել՝ հայկական մոցառելան ամբողջությամբ կփոխարինի իտալականին, թե ոչ, սակայն Հայաստանն արդեն հասնում է ռուսական շուկայում կաթնամթերքի ներկրման մրցակից հանդիսացող Բելառուսին և Սերբիային:
