ԵՐԵՎԱՆ, 9 հունիսի — Sputnik. Հայ արտադրողները կարող են պանրի եվրոպական տեսակներ արտադրել և արտահանել ռուսական շուկա, «Միր» հեռուստաընկերությանն է ասել ՀՀ գյուղատնտեսության նախարարի տեղակալ Ռոբերտ Մակարյանը։
Նրա խոսքով` Հայաստանում տարեկան շուրջ 20 հազար տոննա պանիր է արտադրվում։ Հայկական պանրի առանձնահատկությունն այն է, որ պատրաստվում է կովի կաթից, ինչը մթերքին յուրահատուկ համ է հաղորդում։
Կովի կաթի հատկությունները թույլ են տալիս նաև պանրի եվրոպական տեսակներ արտադրել` Ռոկֆոր, Մոցառելա, Գաուդա, Չեդեր։ Հենց դրանց շնորհիվ էլ հայ պանրագործները պատրաստվում են ավելացնել Ռուսաստան արտահանվող պանրի ծավալները, քանի որ ՌԴ-ում արգելք է սահմանված եվրոպական երկրների արտադրանքի համար։
«Մենք հայկական ավանդական պանրի տեսակներ ենք արտահանում` «Լոռի» և «Չանախ», որոնք օգտագործում են միայն Ռուսաստանում բնակվող հայերը։ Եվ այժմ մեր արտադրողները որոշել են զբաղվել պանրի եվրոպական տեսակների արտադրությամբ, և մենք ունենք բոլոր հնարավորությունները այդ տեսակների արտահանման համար», — ասել է Մակարյանը։
2016 թվականի առաջին եռամսյակի ընթացքում երկրում արտադրվել է շուրջ հինգ հազար տոննա պանիր, որից երկու հազար տոննան արտահանվել է։ Սա գրեթե կրկնակի շատ է անցյալ տարվա ցուցանիշից։
