ԵՐԵՎԱՆ, 9 հոկտեմբերի — Sputnik. Գյումրիում մարդիկ հավաքվել և բոյկոտում են հանձնաժողովի նիստը, որի ընթացքում ներկայացված է օրակարգային երեք հարց: Գյումրու թիվ 34 ԸԸՀ նիստում ներկայացված հարցերից առաջինը հոկտեմբերի 2-ին կայացած ավագանու ընտրությունների արձանագրութունների քննարկումն է, երկորդը՝ ընտրութունների արդյունքների որոշման կայացումը, և երրորդ՝ ավագանու անդամների ընտրության որոշման կայացումը:
Հավաքվածները նախ ՀՀ գլխավոր դատախազի ներկայությունն են պահանջում, ապա՝ հանձնաժողովի կողմից արդյունքների իրական որոշման կայացում: Խոսքը վերաբերում է ավագանու մանդատների թվին: Մարդկանց մի մասը հանձանաժողվից պահանջում է ոչ իրավական համարել հոկտեմբերի 2-ին կայացած ընտրությունների արդյունքները և որոշում կայացնել նոր ընտրությունների անցկացման վերաբերյալ:
Կենտրոնական ընտրական հանձնաժողովի (ԿԸՀ) նախնական տվյալներով՝ հոկտեմբերի 2-ին Գյումրիում կայացած ՏԻՄ ընտրությունների քվեարկությանը մասնակցել է 46 092 մարդ կամ ընտրողների 36.59%-ը:
Գյումրիում մրցում էր 11 քաղաքական ուժ (10 կուսակցություն և մեկ դաշինք)։ Նախնական արդյունքների համաձայն՝ առաջին տեղը զբաղեցրած Բալասանյան դաշինքը ստացել է 14 987 ձայն (34.75%): Երկրորդ տեղում «Բարգավաճ Հայաստան» կուսակցությունն է՝ 9344 ձայնով (21.66%), երրորդում՝ «Հայկական վերածնունդը»՝ 4578 ձայնով (10.62%): Չորրորդ տեղում «Գալա» կուսակցությունն է՝ 4517 ձայնով (10.47%)։
Մյուս կուսակցությունները չեն հաղթահարել վեց տոկոս անցողիկ շեմը։ «Գյումրեցու ոգի» կուսակցությունը ստացել է 2475 ձայն (5․74%), «Համախմբումը»՝ 2469 ձայն (5.72%), Հայ հեղափոխական դաշնակցությունը՝ 2313 ձայն (5.36%), «Ալյանսը»՝ 774 ձայն (1.79%), «Քաղաքացիական պայմանագիրը»՝ 638 ձայն (1.48%), «Գործարար» կուսակցությունը՝ 556 ձայն (1.29%), Հայ ազգային կոնգրեսը՝ 417 ձայն (1.09%)։
Հոկտեմբերի 6-ին «ԳԱԼԱ»-ն, ԲՀԿ-ն և «Հայկական վերածնունդը» փաստաթուղթ են ստորագրել, որում իրենց հաշվարկն են ներկայացրել՝ ավագանու 15 մանդատ՝ «Բալասանյան դաշինքին», 9 մանդատ՝ «Բարգավաճ Հայաստանին», 5-ը` «Հայկական վերածնունդ» կուսակցությանը, և 4-ը` «ԳԱԼԱ»-ին։ Ըստ այս հաշվարկի, ընդդիմադիր ուժերն ունեն 18 մանդատ։
