ԵՐԵՎԱՆ, 9 հոկտեմբերի — Sputnik. Գյումրու թիվ 34 ԸԸՀ-ն հաստատեց՝ ավագանու 17 մանդատ տրվում է «Բալասանյան» դաշինքին, 8 մանդատ՝ «Բարգավաճ Հայաստան» կուսակցությանը, 4 մանդատ՝ «Հայկական վերծնունդ» կուսակցությանը, ևս 4-ն էլ՝ ԳԱԼԱ կուսակցությանը: ԸԸՀ-ը այս որոշումը հաստատեց և արձանագրեց 6 կողմ և 1 դեմ ձայների հարաբերակցությամբ:
Առավոտյան կայացած նիստի ժամանակ գրանցվել էր 6 կողմ և 1 ձեռնպահ, սակայն, ինչպես տեղեկացրին ընտրատարածքային ընտրական հանձնաժողովից, այս դեպքում ձեռնպահ քվեարկելու իրավունք չկա՝ անհրաժեշտ է քվեարկել կողմ կամ դեմ, և հանձնաժողովի «ձեռնպահ» անդամն այս դեպքում դեմ քվեարկեց այդ որոշմանը:
Որոշումն ուժի մեջ մտավ հրապարակման պահից և այն կարող է բողոքարկվել 3 օրվա ընթացքում ՝վարչական դատարանում:
Թիվ 34 ԸԸՀ-ի նույն օրվա ընթացքում նիստ գումարեց և կրկնակի քվերակություն նշանակեց, քանի որ առաջին քվեարկության ժամանակ աղմուկի պատճառով ոչ բոլորն էին տեսել քվեարկության ընթացքը, իսկ վերջում արդյունքերը չէին հայտարարվել:
