ԵՐԵՎԱՆ, 9 հոկտեմբերի — Sputnik, Արմենուհի Մխոյան. Վերջինները գյումրեցիների նվերին արժանացան ի նշան Գյումրիում ավագանու անդամների ընտրությունների՝ քաղաքական ուժերի մանդատների թիվը «նկարելու» համար: Խոսքը վերաբերում է «Բալասանյան դաշինքին» 2 մանդատ ավելացնելու՝ բոնուսային տարբերակի և դրա փոխարեն «Բարգավաճ Հայաստան» և «Հայկական վերածնունդ» կուսակցություններից մեկական մանդատ վերցնելու որոշմանը:
Թե ինչպես և մաթեմատիկական ինչպիսի հաշվարկով էր «Բալասանյան դաշինքի» 15 մանդատին ավելացել ևս 2-ը, դեռ մի քանի օր առաջ հայտարարել էր ԿԸԸ-ի նախագահ Տիգրան Մուկուչյանը: Նա նշել էր, որ լրացուցիչ բոնուսների հաշվին «Բալասանյան» դաշինքին պետք է բաժին հասնի 17 մանդատ (15 մանդատ, ևս 2-ը՝ լրացուցիչ): Նա նաև հայտարարել էր, որ որևէ կուսակցությունից մանդատ չի խլվի, սակայն իարականությունն այլ էր. պարզվեց, որ «Բարգավաճ Հայաստան» կուսակցության 9, իսկ «Հայկական վերածնունդ» կուսակցության 5 մանդատից 1-ական պակասել էր:
Գյումրիում հոկտեմբերի 9-ին ամփոփվելու էին ՏԻՄ ընտրությունների արդյունքները: Լարված իրավիճակ էր ընտրական գործընթացը կանոնակարգող թիվ 34 ընտրատարածքային ընտրական հանձնաժողովի մուտքի մոտ: Շատ գյումրեցիներ հավաքվել էին ներկա գտնվելու հանձնաժողովի նիստին, որի ժամանակ հանձնաժողովը պետք է վերջնական որոշում կայացներ հոկտեմբերի 2-ին կայացած ընտրությունների արդյունքների վերաբերյալ և հայտարարեր ավագանու կազմը: Իրավապահ մարմինների թույլտվությամբ հանձնաժողովի նիստին ներկա գտնվեցին ԶԼՄ ներկայացուցիչները, ավագանու թեկնածուները և վստահված անձիք: Մինչ նիստը սկսվելը ներսում ևս լարված իրավիճակ սկսվեց՝ բողոքներ և ընտրությունների իրական արդյունքների հրապարակման կոչեր:
Հանձնաժողովն իր նիստը սկսեց մի փոքր ուշացումով, ապա հանձնաժողովի նախագահ Էդվարդ Բաղրամյանը նախ ներկայացրեց հանձնաժողովի օրակարգային հարցերը՝ առաջինը հոկտեմբերի 2-ին կայացած ավագանու ընտրությունների արձանագրութունների քննարկում, երկորդը՝ ընտրութունների արդյունքների որոշման կայացում, և երրորդ՝ ավագանու անդամների ընտրության որոշման կայացում: Այնուհետև հանձնաժողովի նախագահն անդրադառնալով ավագանու անդամների մանդատների բաշխմանը՝ նշեց, որ ՀՀ ԸՕ 141 հոդվածի 3-րդ մասի առաջին պարբերության համաձայն՝ մանդատները բաշխվում են այն կուսացություններին, որոնք ստացել են կողմ քվեարակած թերթիկների և անճշտությունների գումարի՝ կուսակցության դեպքում՝ 6 տոկոս, իսկ կուսակցություն-դաշինքի դեպքում 8 տոկոս քվերակության քվեաթերթիկներ: Ըստ այդմ՝ «Բալասանյան դաշինքը» ստացել է 34.67% քվե, «Բարգավաճ Հայաստան» կուսակցությունը՝ 21.62%, «Հայկական վերածնունդը»՝ 10.59%, «Գալա» կուսակցությունը՝ 10.45%։
Մյուս կուսակցությունները չեն հաղթահարել վեց տոկոս անցողիկ շեմը։ «Գյումրեցու ոգի» կուսակցությունը ստացել է 2475 ձայն (5․74%), «Համախմբումը»՝ 2469 ձայն (5.72%), Հայ հեղափոխական դաշնակցությունը՝ 2313 ձայն (5.36%), «Ալյանսը»՝ 774 ձայն (1.79%), «Քաղաքացիական պայմանագիրը»՝ 638 ձայն (1.48%), «Գործարար» կուսակցությունը՝ 556 ձայն (1.29%), Հայ ազգային կոնգրեսը՝ 417 ձայն (1.09%)։
ՀՀ ընտրական օրենսգրքի 123 հոդվածի 2-րդ մասի համաձայն՝ Գյումրու ավագանին կազմված է 33 անդամից: ՀՀ ԸՕ 141 հոդվածի 4-րդ մասում սահմանված բանաձևի համաձայն՝ «Բալասանյան» դաշինքի» մանդատների թիվը կազմում է 15, «Բարգավաճ Հայաստան» կուսակցությանը՝ 9, «Հայկական վերածնունդ» կուսակցությանը՝ 5, «Գալա» կուսակցությանը մանդատների թիվը՝ 4: Գյումրու ավագանու տեղերի թիվը 33 է, որի պայմաններում 15 մանդատը շատ է 40 տոկոսից և պակաս մանդատների բացարձակ մեծամասնությունից՝ 17-ից:
ՀՀ ԸՕ 141 հոդվածի 5-րդ կետերի համաձայն՝ նման դեպքում տեղերի բացարձակ մեծամասնությունը տրվելու է «Բալասանյան դաշինքին», իսկ մնացած 16 մանդատները պետք է բաշխվեն մյուս երեք կուսակցությունների ընտրական ցուցակների միջև՝ «Բարգավաճ Հայաստան» կուսակցությանը՝ 8 «Հայկական վերածնունդ» կուսակցությանը՝ 4, «Գալա» կուսակցությանը՝ 4 մանդատ:
Հիմք ընդունելով վերոգրյալը և ղեկավարվելով ՀՀ ԸՕ 141 հոդվածի 2-րդ մասի առաջին կետով թիվ 34 ԸԸՀ-ը որոշել է՝ Գյումրու ավագանու անդամներ են ընտրվել՝ «Բալասանյան դաշինքի» թեկնածուների ցուցակից 17 անդամ, «Բարգավաճ Հայաստան» կուսակցությունից 8 անդամ, «Հայկական վերածնունդ» կուսակցությունից՝ 4, «Գալա» կուսակցությունից՝ ևս 4 անդամ:
«Այս որոշումն ուժի մեջ է մտնում որոշման հրապարակումից հետո, որոշումը կարող է բողոքարկվել ՀՀ վարչական դատարան՝ սահմանված կարգով և ժամկետներով»,-նշեց թիվ 34 ԸԸՀ նախագահ Էդվարդ Բաղրամյանը՝ որոշումը դնելով հանձնաժողովի քվեարկության:
Նշենք, որ որոշմանը հանձնաժողովի 7 անդամներից 1 քվեարկեց ձեռնպահ, մյուսները՝ կողմ, սակայն, քանի որ քվերակությունից հետո ԸԸՀ նախագահը չհայտարարեց քվերակության արդյունքները, իսկ շատերը չտեսան, թե ինչպես անցավ քվեարկությունը, ավելի ուշ 4 քաղաքական ուժերից 3-ը՝ «Բարգավաճ Հայաստան», «Հայկական վերածնունդը» և «Գալա» կուսակցությունների ավագանիների թեկնածուները ԸԸՀ-ին ներկայացրին դիմում՝ վերաքվերակության վերաբերյալ: Թիվ 34 ԸԸՀ-ը այս դիմումի մասին որոշումը կհրապարակի 5 օրվա ընթացքում:
6 տոկոսի շեմը հաղթահարած կուսակցությունները մտադիր են միավորվել և թիվ 34 ԸԸՀ-ի ավագանու մանդատների թվի վերաբերյալ որոշումը բողոքարկել վարչական դատարանում, իսկ մինչ, այդ ինչպես նախապես հայտարարել էին, կբոյկոտեն ավագանու նիստերը և չեն ներկայանա այդ նիստերին:
