ԵՐԵՎԱՆ, 7 հոկտեմբերի — Sputnik. Նախորդ Կառավարությունները բավական առողջ ծրագրեր ունեին, բայց եղավ տեմպի դանդաղումներ: Այսօր Աժ-ում մեկնաբանելով ՀՀ նախագահ Սերժ Սարգսյանի՝ երեկ կառավարությունում արած այն դիտարկումը, թե այս կառավարությունը կանի այն, ինչ նախորդները չեն արել, ասաց ԱԺ ՀՀԿ խմբակցության ղեկավար Վահրամ Բաղդասարյանը։
«Նոր կառավարությունը ոչ թե պետք է մի կողմ թողնի նախորդների արածը և սկսի նորից, այլ դրանք պետք է շարունակի նոր տեմպով, որպեսզի կարողանա այն բոլոր նպատակներն ու բարեփոխումների ծրագերը, որ մենք դրել ենք մեր առջև, իրականացնել»,- ասաց ՀՀԿ խմբակցության ղեկավարը:
Նա նաև կարծիք հայտնեց, որ կտրուկ փոփոխությունները կարող են վտանգավոր լինել, ուստի նախ պետք է ստեղծել հիմքերը, ապա՝ սկսել իրականացնել ծրագրերը:
Հարցին, թե Հովիկ Աբրահամյանի տեմպը լա՞վը չէր, Վահրամ Բաղդասարյանը պատասխանեց. «Հովիկ Աբրահամյանն իր առջև դրված խնդիրների իրագործման ճանապարհին հենց ինքը հայտարարեց, որ գոհ չէ տեմպերից»:
Անդրադառնալով Սյունքի մարզպետ Սուրիկ Խաչատրյանի պաշտոնանկության հարցին, Վահրամ Բաղդասարյանն ասաց, որ նա «հաջողված մարզպետ էր, իր գործունեությունը՝ որպես մարզպետ, կատարում էր բավական հաջող»:
Իսկ նրան այլ՝ անփորձ անձով փոխարինելու որոշումը, ՀՀԿ պատգամավորի խոսքով, կայացվել է վարչապետի կողմից՝ ՀՀ նախագահի հետ համաձայնեցնելով:
