ԵՐԵՎԱՆ, 7 հոկտեմբերի — Sputnik. Նոր վարչապետը բավական լուրջ, բազմաբնույթ, տաբուներով չկաշկանդված քայլեր է անում: Հետևելով նորանշանակ վարչապետի գործունեությունը, նման եզրակացության է հանգել ԱԺ ՀՅԴ խմբակցության ղեկավար Արմեն Ռուստամյանը:
Միաժամանակ, պատգամավորը կարևորում է, որ այդ քայլերը լինեն նպատակային և չկրեն հախուռն բնույթ:
Հարցին, թե ի՞նչը ստիպեց հանրապետության նախագահին՝ գնալ փոփոխությունների, և արդյո՞ք դրանք առաջիկա համապետական ընտրությունների նախապատրաստման համատեքստում չէին, Արմեն Ռուսամյանը պատասխանեց. «Ստիպեց այն, որ այլևս այսպես հնարավոր չէր, կուտակվել էին խնդիրներ, որոնց պետք էր լուծում տալ»:
Անդրադառնալով մարզպետների, մասնավորապես, Շիրակի դաշնակցական մարզպետի հնարավոր հրաժարականի խնդրին՝ կապված Շիրակի մարզում կայացած ՏԻՄ ընտրություններում կուսակցության անբավարար ձայների հետ, Արմեն Ռուստամյանը պատասխանեց.
«Մարզպետի խնդիրն այն է, որ կարողանա տվյալ մարզի հարցերը ժամանակին լուծել հստակ պատկերացումներով և ստանալ ժողովրդի հարգանքը»
Ինչ վերաբերում է ընտրության արդյունքին, Ռուստամյանը հայտնեց, որ կուսակցությունում այդ հարցով քննություն է կատարվում, և ամբողջ պատկերն ունենալուց հետո կկայացվի համապատասխան որոշում: Մարզպետին պաշտոնանկ անելու որոշումը կարող է կայացնել միայն ՀՅԴ Գերագույն մարմինը:
