ԵՐԵՎԱՆ, 6 հոկտեմբերի — Sputnik. ՀՀ կառավարության նիստի այսօրվա օրակարգում ներառվեց Սյունիքի մարզպետ Սուրիկ Խաչատրյանին աշխատանքից ազատելու հարցը: Այս մասին նշված է կառավարության կայքում
Որոշման նախագծում նշված է. «Ղեկավարվելով Հայաստանի Հանրապետության Սահմանադրության (2005 թվականի փոփոխություններով) 88.1-ին հոդվածով և հիմք ընդունելով Հայաստանի Հանրապետության Նախագահի 1997 թվականի մայիսի 6-ի ՆՀ-728 հրամանագրի 1.7-րդ կետը` Հայաստանի Հանրապետության կառավարությունը ո ր ո շ ու մ է.
Սուրիկ Խաչատրյանին ազատել Հայաստանի Հանրապետության Սյունիքի մարզպետի պաշտոնից՝ իր դիմումի համաձայն»:
Որոշ ԶԼՄ-ներ արդեն հայտնել են նաև Սյունիքի նոր մարզպետի անունը։ Ըստ տեղեկությունների` այդ պաշտոնը զբաղեցնելու է ՀՀ ՊՆ տեղեկատվության և հասարակայնության հետ կապերի վարչության պետ, գեներալ-մայոր Վարդան Ավետիսյանը, սակայն կառավարության նիստի այսօրվա օրակարգում հրապարակվել է նաև մեկ այլ որոշման նախագիծ, որի համաձայն` Սյունիքի մարզպետ կնշանակվի Վահե Հակոբյանը։
