ԵՐԵՎԱՆ, 6 հոկտեմբերի — Sputnik. Սիրիայից հայ համայնքի ներկայացուցիչների տարհանումը կնշանակի պատմամշակութային և այլ արժեքների կորուստ տվյալ արաբական երկրի տարածքում, լրագրողներին ասաց Գևորգյանը։
«Սիրիայում մենք հսկայական քանակությամբ պատմամշակութային հուշարձաններ ունենք, և ցավալի է գիտակցել, որ այդ ամենը չի պահպանվի։ Եթե մեր հայրենակիցները լքեն Սիրիան, կարելի է համարել, որ սիրիահայերի պատմամշակութային ժառանգությունը կորստի կմատնվի», — ասաց Գևորգյանը։
Նրա խոսքով, Սիրիայում մնալ-չմնալու հարցը պետք է լուծեն հայ համայնքի ներկայացուցիչները, առավել ևս, որ նրանք այդ երկրի քաղաքացիներ են։
Գևորգյանը նշեց, որ մեր որոշ հայրենակիցներ ինքնակամ մնում են Սիրիայում, մասնավորապես, Հալեպում` չնայած նրանց կյանքին սպառնացող վտանգին և հայազգի զոհեր ունենալուն։ Դրա վառ ապացույցն այն փաստն է, որ 30 հայ կառավարական զորքերի կազմում է զոհվել Սիրիայում։ Նրանք դա անում են սեփական կամքով, ոչ ոք նրանց չի ստիպում։ Միաժամանակ, Գևորգյանը նշեց, որ խնդիրը, որի հետ բախվել է հայ համայնքը, նոր չէ։
Փորձագիտական հանրությունը բազմիցս անդրադարձել է այդ թեմային, սակայն մինչև օրս նման դեպքերի համար գործողությունների ծրագիր չկա։
«Եթե իսլամական աշխարհի կոնկրետ տարածաշրջանում հայտնվում է կայծ, ապա, որպես կանոն, կրակը տարածվում է նաև մյուս երկրների վրա։ Հիմա արդեն ուշ է ինչ-որ բան անելը։ Այսինքն, եթե մենք ցանկանում ենք տարհանել հայերին Սիրիայից, ապա պետք է հասկանանք, որ այդ դեպքում մենք Սիրիայում այլևս անելիք չունենք»,- ասաց Գևորգյանը։
Նա առաջարկում է գործողությունների ծրագիր մշակել արաբական աշխարհի մյուս երկրներում, օրինակ՝ Լիբանանում, իրադարձությունների նման զարգացման դեպքում, որտեղ իրավիճակը պարբերաբար ապակայունանում է։
Գևորգյանի խոսքով, Սիրիայում հակամարտության ընթացքում մահացել է ավելի քան 120 հայ խաղաղ բնակիչ և 30 հայ զինվորներ։ Սիրիայի հայ համայնքը Մերձավոր Արևելքի ամենակազմակերպված և ուժեղ համայնքներից մեկն է եղել։ Ներկայում ընթացող իրադարձությունների հետևանքով ծայրահեղ վիճակում են հայտնվել ողջ մերձարևելյան շրջանի հայերը։
Փորձագետը նշեց, որ Իրանում և Լիբանանում այժմ տիրող հանգստությունը չպետք է մոլորեցնի մեզ, չէ՞ որ Սիրիայում մինչև հակամարտության սկսվելը գործել է անվտանգության շատ ուժեղ համակարգ։
