ԵՐԵՎԱՆ, 4 հոկտեմբերի — Sputnik. ՀՀ կառավարության նիստում 2017թ-ի պետական բյուջեի նախագծի քննարկման ժամանակ վարչապետ Կարեն Կարապետյանը հայտարարեց, որ բյուջեն կոշտ է լինելու: Ֆինանսների նախարար Վարդան Արամյանը Sputnik Արմենիայի խնդրանքով բացեց փակագծերը: Բյուջեի կոշտությունը հատկապես կզգան թոշակառուներն ու նպաստառուները: Կենսաթոշակների և նպաստների ավելացում ինչպես այս, այնպես էլ հաջորդ տարի չի նախատեսվում:
«Շատ դժվար է թոշակառուի աչքերին նայել և ասել՝ մենք խնդիրներ ունենք բյուջեի հետ, բայց մյուս կողմից, որպես տնտեսագետ և ֆինանսիստ, ես կարծում եմ ճիշտ չէ, որ մենք պարտք վերցնենք, որպեսզի թոշակներ ու նպաստներ տանք: Մենք պետք է տնտեսական աճին ձեռնամուխ լինենք, նոր դրանից հետո, բնականաբար, կբարձրացնենք թոշակներն ու նպաստները»,- ասաց Արամյանը:
Բացի կոշտ լինելուց` 2017թ. պետական բյուջեն, նախարարի խոսքով, նաև խելամիտ է և արտացոլում է տնտեսական ներկա իրողությունները: Ծախսերը շատ են, եկամուտները` քիչ, արդյունքում աճում է բյուջեի դեֆիցիտը: Այն ծածկելու համար ներգրավվում են արտաքին ֆինանսական մուտքեր, որոնք էլ մեծացնում են պետական պարտքը: Տնտեսության համար աղետաբեր այս համակարգը փոխելու համար նորանշանակ կառավարությունն առաջարկում է կրճատել անհարկի ծախսերը, հրաժարվել նոր պարտքեր ներգրավելուց:
«2017թ-ին տնտեսական աճի ցուցանիշը մենք ծրագրել ենք 3.2%, որովհետև 2 տարի անընդմեջ, երբ մենք պակասուրդը ավելի ենք թույլ տվել, քան նախատեսված է եղել բյուջեով, հիմնական ծանրությունն ընկել է կապիտալ ծախսերի վրա: Իսկ ծրագրային գրասենյակների միջոցով արտաքին ֆինանսավորմամբ իրականացվող ծագրերը հիմնականում կապիտալ շինարարական ծրագրերն են»,- ասաց Արամյանը՝ հավելելով, որ հենց այս ծրագրերի շնորհիվ է հնարավոր եղել ապահովել որոշակի տնտեսական աճ:
Նորանշանակ կառավարությանն անհանգստացնում է հատկապես պետական պարտքի չափը կառավարելի մակարդակում պահելու հարցը: Իսկ ֆինանսների նորանշանակ նախարարի խնդիրը, նրա ձևակերպմամբ, «խելամիտ հարկաբյուջետային քաղաքականություն վարելն է»: ՀՀ պետական պարտքի ցուցանիշն այս տարեվերջին, Արամյանի հաշվարկներով, կկազմի 5.9 մլրդ դոլար, ինչը ՀՆԱ-ի 49 %-ն է: Այս ցուցանիշը, սակայն, ֆինանսների նախարարը վտանգավոր չի համարում:
Ինչ վերաբերում է օլիգարխների ու մենաշնորհների դեմ պայքարին, Ֆինանսների նորանշանակ նախարարը նրանց գոյությունը տնտեսության մեջ բնական է համարում:
«Մարդկությունը երբ ծնվել է, օլիգարխիա հասկացությունը ծնվել է նրա հետ: Նախնադարում լավ օլիգարխը եղել է լավ մամոնտ սպանողը, որին հասել է ամենամեծ կտորը»,- ասաց Վարդան Արամյանը։
Նա միաժամանակ վստահեցրեց, որ կառավարության խնդիրն է ոչ թե պայքարել նրանց դեմ, այլ բերել օրինական դաշտ:
