ԵՐԵՎԱՆ, 28 սեպտեմբերի — Sputnik. Հայաստանի Ազգային ժողովը սեպտեմբերի 28-ի նիստում սկսեց քննարկել ՊԵԿ պաշտոնյաների աշխատավարձերի հարցը, «Պետական պաշտոններ զբաղեցնող անձանց վարձատրության մասին» օրենքում փոփոխություններ նախագիծը ներկայացրեց և որոշ դրույթներ պարզաբանեց ՊԵԿ նախագահի տեղակալ Վախթանգ Միրումյանը։
Նախագծով կառավարությունն առաջարկում է օրենքում վերականգնել ՊԵԿ նախագահի և տեղակալների, ինչպես նաև մի շարք այլ պաշտոնյաների մասին դրույթները այնպես, ինչպես դրանք եղել են մինչև ֆինանսների նախարարության կազմում ներառելը: Նախատեսվում է նաև օրենքից հանել պետական և ծառայողական գաղտնիքին տիրապետելու համար նախատեսված հավելումները: Բայց Միրումյանը հայտնեց, որ գաղտնիքին տիրապետող անձանց աշխատավարձը դրանից չի պակասի, այլ կներառվի նրանց հիմնական աշխատավարձերում:
ԱԺ պատգամավոր Թևան Պողոսյանը հարց ուղղեց զեկուցողին` վկայակոչելով մամուլի հրապարակումներն այն մասին, որ ՊԵԿ-ն առաջիկայում կարող է բաժանվել հարկային և մաքսային մարմինների:
«Վերջնական որոշում այս հարցի շուրջ կա ՞, որ հիմա քննարկում ենք,- հարցրեց պատգամավորը,- գուցե սպասե՞նք մինչև կառավարությունը վերջնականապես իրականացնի փոփոխությունները, նոր օրենքը փոխենք»:
ՊԵԿ փոխնախագահ Վախթանգ Միրումյանն էլ ասաց, որ նման քննարկում իրեն հայտնի չէ: «Կարծում եմ, որ եթե առաջնորդվենք նման սկզբունքով, ամեն հարցում էլ կարող ենք ասել` սպասենք լինի, նոր »,- ասաց նա:
Իսկ ԱԺ ԲՀԿ խմբակցության ղեկավար Նաիրա Զոհրաբյանը նշեց, որ կառավարության ներկայացրած նախագիծը ոչ թե տեխնիկական բնույթի է, այլ ունի քաղաքական ենթատեքստ:
«Երեկ կառավարությունն իրականացրեց կառուցվածքային փոփոխությունները: Այն նախարարությունները, որ ակնհայտորեն պետք է դառնային կոմիտե, բայց քանի որ տվյալ անձը տեր ուներ, մնացին նախարարություններ, հարաբերականորեն «անտերները» վերաձևվեցին կոմիտեների: Հերթական կարուձևը տեղի ունեցավ հերթական խումբ մարդկանց համար»,- ասաց Զոհրաբյանը։
Նա հավելեց, որ եթե նպատակը արդարության վերականգնումն է ՊԵԿ նախագահի և նրա տեղակալների վարձատրության կոնտեքստում, ապա հանուն արդարության` ՊԵԿ-ը պետք է հրաժարվի նաև 10% հավելավճարներից:
